IND vs ZIM T20 | జింబాబ్వేపై ఘన విజయం..సిరీస్ కైవసం!

* 81 పరుగులతో చెలరేగిన ఇషాన్ కిషన్

* మరో మ్యాచ్ మిగిలి ఉండగానే భారత్‌కు సిరీస్

ఆకేరు న్యూస్, డెస్క్: జింబాబ్వే పర్యటనలో టీమిండియా జోరు కొనసాగుతోంది. తొలి టీ20లో ఘన విజయం సాధించిన భారత్.. రెండో మ్యాచ్‌లోనూ ప్రత్యర్థిని చిత్తు చేసింది.

హరారే వేదికగా జరిగిన రెండో టీ20లో భారత్ నిర్దేశించిన 220 పరుగుల భారీ లక్ష్యాన్ని ఛేదించలేక జింబాబ్వే 17.5 ఓవర్లలో 129 పరుగులకే ఆలౌటైంది. దీంతో టీమిండియా 90 పరుగుల తేడాతో భారీ విజయం సాధించి.. మరో మ్యాచ్ మిగిలి ఉండగానే సిరీస్‌ను కైవసం చేసుకుంది.

* ఇషాన్ మెరుపులు.. తిలక్ ఫినిషింగ్

టాస్ ఓడి తొలుత బ్యాటింగ్‌కు దిగిన భారత్ నిర్ణీత 20 ఓవర్లలో 5 వికెట్ల నష్టానికి 219 పరుగుల భారీ స్కోరు చేసింది.

ఇషాన్ కిషన్ 44 బంతుల్లో 81 పరుగులతో ఇన్నింగ్స్‌కు వెన్నెముకగా నిలిచాడు. మరోవైపు తిలక్ వర్మ 29 బంతుల్లో అజేయంగా 60 పరుగులు చేసి స్కోరును 200 దాటించాడు. యువ సంచలనం వైభవ్ సూర్యవంశీ 9 బంతుల్లో 20 పరుగులు చేయగా.. కెప్టెన్ శ్రేయస్ అయ్యర్ 25 పరుగులు చేశాడు.

ఇషాన్-శ్రేయస్ మూడో వికెట్‌కు 66 పరుగులు జోడించగా.. ఆ తర్వాత ఇషాన్-తిలక్ జోడీ నాలుగో వికెట్‌కు 94 పరుగుల కీలక భాగస్వామ్యం నెలకొల్పింది.

జింబాబ్వే తరఫున న్యూమాన్ న్యామ్హురి, రిచర్డ్ నగరవా, బ్రయాన్ బెన్నెట్, బ్లెస్సింగ్ ముజరబాని, సికందర్ రజా తలా ఒక వికెట్ తీశారు.

* 129కే జింబాబ్వే ఆలౌట్

220 పరుగుల భారీ లక్ష్యంతో బరిలోకి దిగిన జింబాబ్వేను భారత బౌలర్లు ఏ దశలోనూ కోలుకోనివ్వలేదు. బ్రయాన్ బెన్నెట్ 32 పరుగులతో పోరాడినా భారీ లక్ష్యం ముందు అది సరిపోలేదు. భారత బౌలర్లు వరుస విరామాల్లో వికెట్లు పడగొట్టడంతో జింబాబ్వే 17.5 ఓవర్లలో 129 పరుగులకే కుప్పకూలింది.

యశ్ ఠాకూర్.. బెన్నెట్‌ను ఔట్ చేసి తన తొలి టీ20 అంతర్జాతీయ వికెట్‌ను ఖాతాలో వేసుకున్నాడు. ప్రిన్స్ యాదవ్.. బెన్ కర్రన్, సికందర్ రజాలను పెవిలియన్‌కు పంపించాడు. రవి బిష్ణోయ్, శివమ్ దూబే, తిలక్ వర్మ, అభిషేక్ శర్మ కూడా వికెట్లు సాధించి జింబాబ్వే బ్యాటింగ్‌ను కట్టడి చేశారు.

వరుసగా రెండు టీ20ల్లోనూ జింబాబ్వేపై ఆధిపత్యం ప్రదర్శించిన టీమిండియా.. మూడు మ్యాచ్‌ల సిరీస్‌ను 2-0తో సొంతం చేసుకుంది. ఇక చివరి టీ20లోనూ విజయం సాధించి సిరీస్‌ను క్లీన్‌స్వీప్ చేయడమే భారత్ ముందున్న లక్ష్యం.