Asian Games| లంకపై భారత్ భారీ విజయం

Published: 01 Oct 2026 • 06:37 PM

* ఫైనల్లో పాక్‌తో పోరు

Asian Games| ఆకేరు న్యూస్, డెస్క్: ఆసియా క్రీడల పురుషుల క్రికెట్‌లో భారత జట్టు ఫైనల్‌కు చేరుకుంది. శ్రీలంకతో జరిగిన సెమీఫైనల్‌లో టీమిండియా 124 పరుగుల తేడాతో ఘన విజయం సాధించింది. ఈ గెలుపుతో అక్టోబర్ 3న జరిగే స్వర్ణ పతక పోరులో పాకిస్తాన్‌ను ఎదుర్కోనుంది.

ఇషాన్ కిషన్ మెరుపులు

టాస్ గెలిచిన భారత్ ముందుగా బ్యాటింగ్ చేసింది. ఆరంభంలో కీలక వికెట్లు కోల్పోయినప్పటికీ ఇషాన్ కిషన్ అద్భుత బ్యాటింగ్‌తో జట్టును ఆదుకున్నాడు. 46 బంతుల్లో 80 పరుగులతో నాటౌట్‌గా నిలిచిన ఇషాన్.. బౌండరీలతో స్కోర్ బోర్డును పరుగులు పెట్టించాడు. ఓపెనర్ వైభవ్ సూర్యవంశీ 38 పరుగులు చేయడంతో భారత్ 20 ఓవర్లలో 7 వికెట్లకు 169 పరుగులు చేసింది.

45 పరుగులకే ఆలౌట్

170 పరుగుల లక్ష్యంతో బరిలోకి దిగిన శ్రీలంకకు భారత బౌలర్లు ఏమాత్రం అవకాశం ఇవ్వలేదు. తొలి ఓవర్‌లోనే జస్ప్రీత్ బుమ్రా రెండు వికెట్లు తీసి లంక బ్యాటింగ్‌పై ఒత్తిడి పెంచాడు. అనంతరం అక్షర్ పటేల్, అభిషేక్ శర్మ స్పిన్‌కు శ్రీలంక బ్యాటర్లు వరుసగా పెవిలియన్ చేరారు.

చివరకు శ్రీలంక 9.5 ఓవర్లలో కేవలం 45 పరుగులకే ఆలౌటైంది. నువనిదు ఫెర్నాండో 15 పరుగులతో టాప్ స్కోరర్‌గా నిలిచాడు. భారత బౌలర్లలో బుమ్రా, అక్షర్ పటేల్, అభిషేక్ శర్మ రెండేసి వికెట్లు పడగొట్టగా.. వాషింగ్టన్ సుందర్ ఒక వికెట్ తీశాడు.

అక్టోబర్ 3న భారత్-పాక్ ఫైనల్

శ్రీలంకపై విజయంతో భారత్ స్వర్ణ పతకానికి ఒక్క అడుగు దూరంలో నిలిచింది. అక్టోబర్ 3న భారత్, పాకిస్తాన్ మధ్య గోల్డ్ మెడల్ మ్యాచ్ జరగనుంది. భారత కాలమానం ప్రకారం ఉదయం 9:30 గంటలకు మ్యాచ్ ప్రారంభం కానుంది. మరోవైపు శ్రీలంక కాంస్య పతకం కోసం బంగ్లాదేశ్‌తో పోటీపడనుంది.