KTPP EMPLOYEES PROTEST | నల్ల బ్యాడ్జీలతో నిరసన

Published: 21 Jul 2026 • 02:57 PM

* వానను సైతం లెక్కచేయకుండా కేటీపీపీ ఉద్యోగుల ఆందోళన

ఆకేరు న్యూస్ , భూపాలపల్లి:
నల్గొండ జిల్లా దామరచర్లలోని యాదాద్రి థర్మల్ పవర్ ప్లాంట్‌ (YTPCL) లోని కోల్ హ్యాండ్లింగ్, యాష్ హ్యాండ్లింగ్ విభాగాల ప్రైవేటీకరణ టెండర్లను వెంటనే ఉపసంహరించుకోవాలని డిమాండ్ చేస్తూ ఉద్యోగులు చేపట్టిన నిరసనలు రోజురోజుకూ తీవ్రరూపం దాలుస్తున్నాయి. జయశంకర్ భూపాలపల్లి జిల్లాలోని కాకతీయ థర్మల్ పవర్ ప్లాంట్ (KTPP) ప్రధాన ద్వారం వద్ద ఉద్యోగులు గురువారం నాటికి 25వ రోజుకు చేరిన ఆందోళన కార్యక్రమాన్ని కొనసాగించారు.
ఎడతెరిపి లేకుండా కురుస్తున్న వర్షాన్ని సైతం లెక్కచేయకుండా, ఉద్యోగులు నల్ల బ్యాడ్జీలు ధరించి తమ నిరసనను వ్యక్తం చేశారు.

* ఉద్యోగ భద్రతకే ముప్పు

విద్యుత్ ఉత్పత్తి సంస్థల్లో అత్యంత కీలకమైన ‘ఆపరేషన్’ విభాగాలను ప్రైవేట్ సంస్థలకు కట్టబెట్టడం వల్ల క్రమంగా ఉద్యోగ భద్రత దెబ్బతింటుందని ఆందోళన వ్యక్తం చేశారు. ప్రైవేటీకరణ నిర్ణయంతో ఉన్న సిబ్బందిపై అసమానంగా పనిభారం పెరుగుతుందని, ఎన్నో ఏళ్ల అనుభవం ఉన్న నిపుణులైన ఉద్యోగులను పక్కన పెట్టే కుట్ర జరుగుతోందని మండిపడ్డారు.
ప్రమాదాల బారిన పడే అవకాశం: అనుభవం లేని కాంట్రాక్టు సిబ్బందితో ప్లాంట్లలో పనిచేయించడం వల్ల భద్రతా ప్రమాణాలు దెబ్బతిని, ప్రమాదాలు జరిగే అవకాశాలు ఎక్కువవుతాయని హెచ్చరించారు.

* టెండర్ నోటిఫికేషన్‌ను తక్షణమే రద్దు చేయాలి

> ప్రభుత్వం మరియు విద్యుత్ సంస్థల యాజమాన్యం తక్షణమే స్పందించి, యాదాద్రి పవర్ ప్లాంట్ విభాగాల ప్రైవేటీకరణ కోసం జారీ చేసిన టెండర్ ప్రక్రియను ఉపసంహరించుకోవాలి. లేనిపక్షంలో నిరసనలను రాష్ట్రవ్యాప్తంగా మరింత ఉధృతం చేస్తాం.
———-