Stray Dogs
* స్థానికుల వినూత్న నిరసన
Stray Dogs|: ఆకేరు న్యూస్, మహారాష్ట్ర: వీధి కుక్కల బెడదను పరిష్కరించాలని కోరుతూ మహారాష్ట్రలోని నాసిక్ జిల్లా నిఫద్ ప్రాంతంలో స్థానికులు వినూత్నంగా నిరసన తెలిపారు. తమ ఫిర్యాదులను అధికారులు పట్టించుకోవడం లేదని ఆరోపిస్తూ.. ఏకంగా వీధి కుక్కలను పట్టుకుని పంచాయతీ కార్యాలయానికి తీసుకెళ్లారు. అనంతరం కార్యాలయంలోనే కుక్కలను వదిలిపెట్టడంతో అక్కడ కొద్దిసేపు ఉద్రిక్త పరిస్థితి నెలకొంది.
పలుమార్లు ఫిర్యాదులు
నిఫద్ పరిధిలో వీధి కుక్కల సంఖ్య పెరిగిపోయిందని స్థానికులు చెబుతున్నారు. రోడ్లు, నివాస ప్రాంతాల్లో గుంపులుగా సంచరిస్తున్న కుక్కలతో ప్రజలు ఇబ్బందులు పడుతున్నారని పేర్కొన్నారు. ముఖ్యంగా రాత్రి వేళల్లో పరిస్థితి తీవ్రంగా ఉంటోందని తెలిపారు. ఈ విషయంపై పంచాయతీ అధికారులకు పలుమార్లు ఫిర్యాదు చేసినా సమస్య పరిష్కారం కాలేదని ఆరోపించారు.
సంచుల్లో కుక్కలను తీసుకొచ్చి..
అధికారుల దృష్టిని ఆకర్షించేందుకు స్థానికులు కొన్ని వీధి కుక్కలను సంచుల్లో బంధించి పంచాయతీ కార్యాలయానికి తీసుకెళ్లారు. అధికారుల గదిలోకి వాటిని తీసుకెళ్లి సమస్య తీవ్రతను వివరించారు. అనంతరం సంచులను తెరిచి కుక్కలను కార్యాలయంలో వదిలారు. దీంతో అధికారులు, సిబ్బంది అప్రమత్తమయ్యారు.
కరెన్సీ నోట్ల దండతో నిరసన
స్థానికులు కరెన్సీ నోట్లతో తయారు చేసిన భారీ దండను కూడా తీసుకొచ్చారు. దానిని పంచాయతీ అధికారికి వేసేందుకు ప్రయత్నిస్తూ తమ నిరసన వ్యక్తం చేశారు. సమస్యపై ఎన్నిసార్లు ఫిర్యాదు చేసినా చర్యలు తీసుకోకపోవడంతోనే ఈ విధంగా నిరసన తెలిపామని స్థానికులు పేర్కొన్నారు.
వైరల్గా వీడియోలు
పంచాయతీ కార్యాలయంలో కుక్కలను వదిలిన ఘటనకు సంబంధించిన వీడియోలు సామాజిక మాధ్యమాల్లో వైరల్గా మారాయి. కార్యాలయంలో కుక్కలు తిరుగుతున్న దృశ్యాలతో పాటు స్థానికులు అధికారులతో వాగ్వాదానికి దిగిన దృశ్యాలు కూడా వైరల్ అవుతున్నాయి. వీధి కుక్కల సమస్యకు తాత్కాలిక చర్యలతో కాకుండా శాశ్వత పరిష్కారం చూపాలని స్థానికులు కోరుతున్నారు. ప్రజల భద్రతను దృష్టిలో ఉంచుకుని సంబంధిత అధికారులు తగిన చర్యలు తీసుకోవాలని డిమాండ్ చేస్తున్నారు.
About the Author
Please tell us what is wrong. Your report will be sent to the website team.
