MARUTI SWIFT DZIRE | మధ్యతరగతి ఫేవరెట్‌గా డిజైర్!

* మేలో 24 వేలకుపైగా అమ్మకాలు

* దేశంలో ఎక్కువ మంది కొనుగోలు చేసిన కారు..

* SUVల జోరులోనూ ఈ కారుకే క్రేజ్

ఆకేరు న్యూస్, డెస్క్: భారత ఆటోమొబైల్ మార్కెట్‌లో ప్రస్తుతం SUVల హవా కొనసాగుతోంది. కొత్త కారు కొనాలనుకునే వారిలో ఎక్కువ మంది SUVల వైపే మొగ్గు చూపుతున్నారు. అయితే ఈ ట్రెండ్ మధ్యలోనూ ఓ సెడాన్ కారు మాత్రం అమ్మకాలలో దుమ్మురేపుతోంది.

ఆ కారు మరేదో కాదు.. మారుతి సుజుకి డిజైర్ (Maruti Suzuki Dzire). SUVల దండయాత్ర మధ్య కూడా దేశంలో అత్యధికంగా అమ్ముడవుతున్న కార్ల జాబితాలో డిజైర్ తన స్థానాన్ని పదిలం చేసుకుంటూ ముందుకు దూసుకెళ్తోంది.

* అమ్మకాలలో మరోసారి సత్తా

2026 మే నెలలో డిజైర్ ఏకంగా 24,546 యూనిట్ల అమ్మకాలను నమోదు చేసింది. ఏప్రిల్‌లో 23,580 యూనిట్లు విక్రయించగా, కేవలం ఒక్క నెలలోనే అమ్మకాలు 4.1 శాతం పెరగడం విశేషం. SUVలు మార్కెట్‌ను శాసిస్తున్న సమయంలో ఒక సెడాన్ కారు ఇంత భారీ స్థాయిలో అమ్ముడవడం ఆటో రంగంలో చర్చనీయాంశంగా మారింది.

* డిజైర్ విజయానికి కారణాలివే..

డిజైర్‌కు భారతీయ కుటుంబాల్లో ఉన్న నమ్మకం, తక్కువ నిర్వహణ ఖర్చు, 5-స్టార్ సేఫ్టీ, అద్భుతమైన 33km మైలేజ్ మైలేజ్, అందుబాటు ధరలు ఈ విజయానికి ప్రధాన కారణాలుగా విశ్లేషకులు చెబుతున్నారు.

ముఖ్యంగా మధ్యతరగతి కుటుంబాలు ఎక్కువగా ఈ కారును ఎంచుకుంటున్నాయి.

ప్రస్తుతం డిజైర్ ఎక్స్-షోరూమ్ ధర **రూ.6.26 లక్షల నుంచి రూ.9.31 లక్షల** వరకు ఉంది. LXi, VXi, ZXi, ZXi+ వేరియంట్లలో ఈ కారు అందుబాటులో ఉంది.

* మైలేజ్‌లో అదరగొడుతోంది

కొత్త తరం డిజైర్‌లో మారుతి సుజుకి 1.2-లీటర్ Z12E మూడు సిలిండర్ల పెట్రోల్ ఇంజన్‌ను అందించింది. ఈ ఇంజన్ 82 bhp పవర్, 112 Nm టార్క్‌ను ఉత్పత్తి చేస్తుంది.

పెట్రోల్ వేరియంట్ లీటరుకు 25.71 కిలోమీటర్ల వరకు, సీఎన్‌జీ వేరియంట్ కిలోకు 33.73 కిలోమీటర్ల వరకు మైలేజ్ అందిస్తుందని కంపెనీ పేర్కొంటోంది.

ఇంధన ఖర్చులు పెరుగుతున్న ప్రస్తుత పరిస్థితుల్లో ఇది వినియోగదారులకు పెద్ద ప్లస్ పాయింట్‌గా మారింది.

* ఫీచర్లలోనూ తగ్గేదేలే!

డిజైర్‌లో 9 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆపిల్ కార్‌ప్లే, ఆండ్రాయిడ్ ఆటో, కనెక్టెడ్ కార్ టెక్నాలజీ, క్రూయిజ్ కంట్రోల్, రియర్ ఏసీ వెంట్స్, 360 డిగ్రీ కెమెరా, ఎలక్ట్రిక్ సన్‌రూఫ్ వంటి ఆధునిక ఫీచర్లు ఉన్నాయి.

ఈ ఫీచర్లు సాధారణ సెడాన్ కంటే ప్రీమియం అనుభూతిని అందిస్తున్నాయి.

* డిజైర్‌ను ప్రత్యేకం చేసిన భద్రత

భద్రత విషయంలో కూడా డిజైర్ కొత్త ప్రమాణాలు సృష్టించింది. భారత్ NCAP క్రాష్ టెస్టుల్లో 5-స్టార్ సేఫ్టీ రేటింగ్ సాధించిన తొలి మారుతి సుజుకి సెడాన్‌గా నిలిచింది.

అన్ని వేరియంట్లలో 6 ఎయిర్‌బ్యాగ్స్, ఎలక్ట్రానిక్ స్టెబిలిటీ ప్రోగ్రామ్ (ESP), హిల్ హోల్డ్ అసిస్ట్, బ్రేక్ అసిస్ట్ వంటి కీలక భద్రతా ఫీచర్లను స్టాండర్డ్‌గా అందిస్తోంది.

* SUVల మధ్యా సెడాన్ సంచలనం

ఒకప్పుడు భారత మార్కెట్‌ను ఏలిన సెడాన్ కార్లు.. SUVల రాకతో వెనుకబడ్డాయనే అభిప్రాయం ఉంది. కానీ డిజైర్ మాత్రం ఆ అంచనాలను తలకిందులు చేస్తూ అమ్మకాలలో తన సత్తా చాటుతోంది. అందుబాటు ధర, అద్భుతమైన మైలేజ్, 5-స్టార్ భద్రత, ప్రీమియం ఫీచర్ల కలయికతో భారతీయ కుటుంబాల ఫస్ట్ ఛాయిస్‌గా కొనసాగుతోంది.