MINISTER BANDI SANJAY | వరంగల్ అభివృద్ధిపై కీలక వ్యాఖ్యలు

* హైదరాబాద్ తరువాత వరంగల్ కే అత్యధిక నిధులు

* వరంగల్ కార్పొరేషన్ ను బీజేపీకి అప్పగించండి – మంత్రి బండి సంజయ్

ఆకేరు న్యూస్, వరంగల్:

వరంగల్ అభివృద్ధికి కేంద్రంలోని నరేంద్ర మోదీ ప్రభుత్వం హైదరాబాద్ తర్వాత అత్యధికంగా నిధులు కేటాయించిందని, కానీ ఆ నిధులను బీఆర్ఎస్, కాంగ్రెస్ నాయకులు దుర్వినియోగం చేశారని కేంద్ర హోంశాఖ సహాయ మంత్రి బండి సంజయ్ కుమార్ ఆరోపించారు.

చిన్నపాటి వర్షానికే వరంగల్ నగరం జలమయం కావడం ఇందుకు నిదర్శనమని విమర్శించారు.

వరంగల్ ఆర్ట్స్ కాలేజీ మైదానంలో నిర్వహించిన బీజేపీ పోలింగ్ బూత్ అధ్యక్షులు, పార్టీ నాయకుల సమావేశంలో ఆయన మాట్లాడారు.

* స్మార్ట్ సిటీ నిధులు ఎక్కడికి వెళ్లాయి?

వరంగల్‌కు స్మార్ట్ సిటీ, అమృత్-1, అమృత్-2 పథకాలతో పాటు కోచ్ ఫ్యాక్టరీ, టెక్స్‌టైల్ పార్క్ వంటి పలు అభివృద్ధి ప్రాజెక్టులకు కేంద్రం నిధులు కేటాయించిందని బండి సంజయ్ అన్నారు.

అయినప్పటికీ నగరంలో ఆశించిన స్థాయిలో అభివృద్ధి కనిపించకపోవడం బాధాకరమన్నారు.

“హైదరాబాద్ తర్వాత కేంద్రం అత్యధిక నిధులు ఇచ్చింది వరంగల్‌కే. అయితే ఆ నిధులు ఎక్కడ ఖర్చయ్యాయి? ఎందుకు వరంగల్ ఇంకా మౌలిక సమస్యలతో సతమతమవుతోంది?” అని ప్రశ్నించారు.

* కాంగ్రెస్ హామీలపై ప్రజలు నిలదీయాలి

ఎన్నికల సమయంలో ఇచ్చిన హామీలను కాంగ్రెస్ ప్రభుత్వం అమలు చేయలేదని బండి సంజయ్ విమర్శించారు. డబుల్ బెడ్‌రూం ఇళ్లు, రైతు భరోసా వంటి హామీల అమలుపై ప్రజలు కాంగ్రెస్ నాయకులను ప్రశ్నించాలని పిలుపునిచ్చారు.

* వరంగల్ కార్పొరేషన్ బీజేపీకి అప్పగించండి

వరంగల్ మున్సిపల్ కార్పొరేషన్‌లో బీజేపీకి అవకాశం ఇస్తే అభివృద్ధి అంటే ఏమిటో చేసి చూపిస్తామని ఆయన అన్నారు.

కరీంనగర్ కార్పొరేషన్‌ను ఉదాహరణగా చూపిస్తూ, అక్కడ కేంద్ర నిధులతో అభివృద్ధి పనులు వేగంగా జరిగాయని పేర్కొన్నారు.

మేయర్ పీఠాన్ని బీజేపీ కైవసం చేసుకుంటే కేంద్రం నుంచి మరిన్ని నిధులు తీసుకొచ్చి వరంగల్‌ను అన్ని రంగాల్లో అభివృద్ధి చేస్తామని హామీ ఇచ్చారు.

* కార్యకర్తలకు దిశానిర్దేశం

స్థానిక సమస్యల పరిష్కారానికి బీజేపీ కార్యకర్తలు ప్రజల మధ్య ఉండాలని, ఇంటింటికీ వెళ్లి కేంద్ర ప్రభుత్వం అందిస్తున్న నిధులు, పథకాల గురించి వివరించాలని సూచించారు.

ప్రతి కార్యకర్త ఎన్నికల వరకు ఒక్కో ఇంటిని కనీసం ఆరు సార్లు సందర్శించాలని పిలుపునిచ్చారు.

అలాగే ప్రజల మధ్య ఉన్న డంపింగ్ యార్డ్ సమస్యను ప్రధాన అంశంగా తీసుకుని పోరాటం చేయాలని, స్థానిక సమస్యలపై రాజీ పడకుండా ఉద్యమాలు కొనసాగించాలని సూచించారు.

* బీజేపీకి అనుకూల వాతావరణం

రాష్ట్రంలో బీజేపీకి అనుకూల పరిస్థితులు ఉన్నాయని, వరంగల్ కార్పొరేషన్ ఎన్నికల్లో పార్టీ మెరుగైన ఫలితాలు సాధిస్తుందని బండి సంజయ్ ధీమా వ్యక్తం చేశారు.

తెలంగాణ రాజకీయాల్లో వరంగల్ కీలక కేంద్రంగా మారబోతోందని, మున్సిపల్ ఎన్నికలను పార్టీకి సెమీఫైనల్‌గా భావిస్తున్నామని పేర్కొన్నారు.