Nallamala Tribal Rights
* మన్ననూర్ ఐటీడీఏ వద్ద ఆదివాసీల ధర్నా
ఆకేరు న్యూస్, నాగర్‌కర్నూల్ : నల్లమల అటవీ ప్రాంతంలోని ఆదివాసీల హక్కుల పరిరక్షణ, సుదీర్ఘకాలంగా పెండింగ్‌లో ఉన్న సమస్యల పరిష్కారం కోసం ‘తుడుం దెబ్బ’ ఆధ్వర్యంలో ఆదివాసీలు సమరశంఖం పూరించారు. నాగర్‌కర్నూల్ జిల్లా అమ్రాబాద్ మండలం మన్ననూర్‌లోని ఐటీడీఏ (ITDA) కార్యాలయం ఎదుట గురువారం భారీ నిరసన, ధర్నా కార్యక్రమాన్ని నిర్వహించారు.
ఈ ఆందోళన కార్యక్రమంలో భాగంగా మన్ననూర్‌లోని స్వామి వివేకానంద విగ్రహం నుంచి ఐటీడీఏ కార్యాలయం వరకు ఆదివాసీ నాయకులు, ప్రజలు భారీ ర్యాలీగా తరలివచ్చారు. తమ సాంప్రదాయ ఆదివాసీ నృత్యాలు, తుడుం మోతలతో మన్ననూర్ పుర వీధులు దద్దరిల్లాయి. నల్లమల మూలమూలల నుంచి తరలివచ్చిన వందలాది మంది ఆదివాసీలు తమ నిరసన గళాన్ని విప్పారు.
మన్ననూర్ ఐటీడీఏకు పూర్తిస్థాయి పాలనా అధికారాలు ఉన్న గ్రూప్-1 స్థాయి ప్రాజెక్ట్ ఆఫీసర్ (PO)ని వెంటనే నియమించాలని నాయకులు గట్టిగా డిమాండ్ చేశారు. అలాగే నల్లమల అటవీ ప్రాంతంలోని ఆదివాసీ గూడేలలో తీవ్రంగా ఉన్న తాగునీరు, రోడ్లు, విద్యుత్, వైద్యారోగ్య సదుపాయాల సమస్యలను తక్షణమే పరిష్కరించాలని కోరారు.
దాంతో పాటు ఆదివాసీలకు రాజ్యాంగబద్ధంగా సంక్రమించిన హక్కులను పరిరక్షించాలని మరియు అటవీ హక్కుల చట్టం ప్రకారం పోడు భూముల సమస్యలను పక్కాగా అమలు చేసి పరిష్కరించాలని ఐటీడీఏ ప్రాంగణంలో నినాదాలు చేశారు.
ఈ సందర్భంగా తుడుం దెబ్బ నాయకులు మాట్లాడుతూ, అధికారులు మరియు ప్రభుత్వాలు మారుతున్నా ఆదివాసీల బతుకుల్లో ఎలాంటి మార్పు రావడంలేదని తీవ్ర ఆవేదన వ్యక్తం చేశారు. ఐటీడీఏ కేంద్రం ఉన్నప్పటికీ సరైన అధికారి లేకపోవడం వల్ల ఆదివాసీల సంక్షేమ పథకాలు పూర్తిగా మూలనపడ్డాయని మండిపడ్డారు.
ప్రభుత్వం ఇప్పటికైనా తక్షణమే స్పందించి తమ న్యాయమైన డిమాండ్లను నెరవేర్చకపోతే ఈ ఆందోళనలను రాబోయే రోజుల్లో మరింత తీవ్రతరం చేస్తామని స్పష్టం చేశారు. అనంతరం తమ డిమాండ్లతో కూడిన వినతిపత్రాన్ని ఐటీడీఏ అధికారులకు అందజేశారు.
About the Author
Please tell us what is wrong. Your report will be sent to the website team.
