NDMA | కేంద్రం ఎమర్జెన్సీ అలర్ట్ టెస్ట్ సక్సెస్

ఆకేరు న్యూస్, డెస్క్: దేశవ్యాప్తంగా మొబైల్ వినియోగదారుల ఫోన్లు ఒక్కసారిగా సైరన్ శబ్దంతో మోగాయి. ఏదైనా ప్రమాదం జరిగిందేమో అని కంగారుపడేలోపే, అది కేంద్ర ప్రభుత్వం పంపిన ‘ఎమర్జెన్సీ అలర్ట్’ (Emergency Alert) అని తేలడంతో అందరూ ఊపిరి పీల్చుకున్నారు. ప్రకృతి విపత్తులు, అత్యవసర పరిస్థితుల సమయంలో ప్రజలను అప్రమత్తం చేసేందుకు కేంద్ర ప్రభుత్వం చేపట్టిన ఈ ప్రయోగం విజయవంతమైంది.

* వచ్చిన అలర్ట్ మెసేజ్…

భూకంపాలు, సునామీలు, వరదలు వంటి ప్రకృతి విపత్తులు లేదా యుద్ధం వంటి అత్యవసర పరిస్థితులు తలెత్తినప్పుడు.. దేశంలోని ప్రతి పౌరుడిని క్షణాల్లో అప్రమత్తం చేసేందుకు కేంద్ర సమాచార, ప్రసార మంత్రిత్వ శాఖ ఈ వ్యవస్థను రూపొందించింది. నేషనల్ డిజాస్టర్ మేనేజ్‌మెంట్ అథారిటీ (NDMA) సహకారంతో, స్వదేశీ సాంకేతిక పరిజ్ఞానాన్ని ఉపయోగించి ఈ ‘సెల్ బ్రాడ్‌కాస్ట్ అలర్ట్ సిస్టమ్’ను సిద్ధం చేశారు.
నేడు ఉదయం 11:46 గంటలకు టెలికాం సేవా సంస్థల ద్వారా అన్ని మొబైల్ ఫోన్లకు ఒకేసారి ఈ అలర్ట్ మెసేజ్ పంపారు. ఫోన్ సైలెంట్ మోడ్‌లో ఉన్నా సరే, బిగ్గరగా సైరన్ మోగడం ఈ వ్యవస్థ ప్రత్యేకత.

* మీకు అలర్ట్ మెసేజ్ రాలేదా?

అయితే మీ ఫోన్‌లో ఈ సెట్టింగ్స్ మార్చుకోండి. కేంద్రం నిర్వహించిన ఈ టెస్టింగ్ సమయంలో చాలా మందికి అలర్ట్ మెసేజ్‌లు వచ్చాయి. అయితే, సాంకేతిక కారణాల వల్లనో లేదా ఫోన్ సెట్టింగ్స్ సరిగ్గా లేకపోవడం వల్లనో కొందరికి ఈ మెసేజ్ అందలేదు. భవిష్యత్తులో నిజమైన విపత్తులు సంభవించినప్పుడు మీరు అలర్ట్ అవ్వాలంటే, వెంటనే మీ ఫోన్‌లో ఈ మార్పులు చేసుకోండి.

ఆండ్రాయిడ్ (Android) ఫోన్ వినియోగదారులు , మీ ఫోన్‌లోని Settings ఓపెన్ చేయండి. అక్కడ Safety & Emergency అనే ఆప్షన్‌పై క్లిక్ చేయండి. అందులో Wireless Emergency Alerts అనే విభాగంలోకి వెళ్లి, అది On లో ఉందో లేదో చూసుకోండి. ఒకవేళ ఆఫ్ అయి ఉంటే వెంటనే ఎనేబుల్ చేయండి.

ఐఫోన్ (iPhone) వినియోగదారులు: ఫోన్ Settings లోకి వెళ్లండి. Notifications ఆప్షన్‌ను ఎంచుకోండి. పేజీని పూర్తిగా కిందికి స్క్రోల్ చేస్తే మీకు Government Alerts అనే విభాగం కనిపిస్తుంది. అక్కడ ఉన్న అలర్ట్ ఆప్షన్లను ఆన్ చేసుకోండి.

* ముఖ్య గమనిక

మీ ఫోన్ సాఫ్ట్‌వేర్ పాతది అయితే కొన్నిసార్లు ఈ అలర్ట్‌లు పని చేయవు. కాబట్టి, మీ ఫోన్ Operating System (OS) ఎప్పటికప్పుడు అప్‌డేట్‌గా ఉండేలా చూసుకోండి.
ప్రజల ప్రాణాలను కాపాడటమే లక్ష్యంగా ప్రభుత్వం చేపట్టిన ఈ బృహత్తర కార్యక్రమం పట్ల టెక్ నిపుణులు హర్షం వ్యక్తం చేస్తున్నారు. విపత్తు సమయాల్లో సమాచారం త్వరగా చేరడం వల్ల ప్రాణ, ఆస్తి నష్టాన్ని గణనీయంగా తగ్గించవచ్చని ప్రభుత్వం భావిస్తోంది. కాబట్టి, పైన పేర్కొన్న సెట్టింగ్స్ చెక్ చేసుకుని మీరు కూడా సిద్ధంగా ఉండండి.