Kodangal Lift Irrigation | 2,100 కోట్లతో కొడంగల్ ఎత్తిపోతల ఫేజ్-II

Published: 14 Aug 2026 • 09:24 PM

* లక్ష ఎకరాలకు సాగునీరు..

* గూడెందొడ్డి సామర్థ్యం 15 టీఎంసీలకు పెంపు

ఆకేరు న్యూస్, హైదరాబాద్: ఉమ్మడి మహబూబ్‌నగర్ (పాలమూరు) జిల్లాను కరువు రహిత ప్రాంతంగా మార్చడమే లక్ష్యంగా తెలంగాణ ప్రభుత్వం మరో అత్యంత కీలకమైన అడుగు వేసింది. సచివాలయంలో ముఖ్యమంత్రి రేవంత్ రెడ్డి అధ్యక్షతన జరిగిన మంత్రివర్గ సమావేశంలో సాగునీటి ప్రాజెక్టులు, పర్యావరణహిత రవాణా వ్యవస్థ, విద్యుత్ రంగానికి సంబంధించిన బహుముఖ సంస్కరణలపై సమగ్ర చర్చ జరిగింది. సమావేశం అనంతరం మంత్రులు పొంగులేటి శ్రీనివాస్ రెడ్డి, అడ్లూరి లక్ష్మణ్ కుమార్ పాత్రికేయుల సమావేశంలో కేబినెట్ తీసుకున్న చారిత్రాత్మక నిర్ణయాలను విస్తృతంగా వెల్లడించారు.

* కరువు రహిత పాలమూరు లక్ష్యం…

దీర్ఘకాలంగా నీటి పారుదల లేక ఇబ్బందులు పడుతున్న పాలమూరు ప్రాంత వ్యవసాయ రంగాన్ని బలోపేతం చేసేందుకు ‘మక్తల్ – నారాయణపేట – కొడంగల్ ఎత్తిపోతల పథకం ఫేజ్-II’ పనులను వేగవంతం చేయాలని ప్రభుత్వం నిశ్చయించింది. ఈ రెండవ దశ నిర్మాణ పనుల కోసం రూ. 2,100 కోట్ల అంచనా వ్యయానికి రాష్ట్ర కేబినెట్ పూర్తిస్థాయి ఆమోదం తెలిపింది.

ఈ ఎత్తిపోతల పథకం ద్వారా మక్తల్, నారాయణపేట, కొడంగల్ నియోజకవర్గాల పరిధిలోని సుమారు లక్ష ఎకరాల ఆయకట్టుకు సకాలంలో సాగునీరు అందనుంది. అంతేకాకుండా, వేసవి కాలంలో ఎదురయ్యే తీవ్ర తాగునీటి ఎద్దడికి శాశ్వత పరిష్కారం లభించడంతో పాటు, ఆయా ప్రాంతాల్లో నిర్మించే పారిశ్రామిక క్లస్టర్లకు సైతం అవసరమైన నీటి వసతి సమకూరనుంది.

* గూడెందొడ్డి పంప్డ్ స్టోరేజీ సామర్థ్యం 15 టీఎంసీలకు పెంపు…

సాగునీటి కేటాయింపులతో పాటు రాష్ట్రంలో రక్షిత మంచినీటి లభ్యత పెంచే దిశగా గూడెందొడ్డి పంప్డ్ స్టోరేజీ ప్రాజెక్టును ఆధునీకరించాలని నిర్ణయించారు. ప్రస్తుతం 1.19 టీఎంసీల నీటి నిల్వ సామర్థ్యంతో ఉన్న ఈ ప్రాజెక్టును ఏకంగా 15 టీఎంసీల స్థాయికి పెంచేందుకు కేబినెట్ గ్రీన్ సిగ్నల్ ఇచ్చింది. నీటి నిల్వ సామర్థ్యం పెరగడం వల్ల వర్షాభావ పరిస్థితులు ఎదురైనా పంటలకు, రక్షిత తాగునీటికి ఎటువంటి ఢోకా ఉండదని స్పష్టం చేశారు.

* సౌర విద్యుత్ ఉత్పత్తిపై ప్రత్యేక అధ్యయనం….

పర్యావరణహిత ఇంధన ఉత్పత్తికి ప్రాధాన్యత ఇస్తూ, గూడెందొడ్డి ప్రాజెక్టు పరిధిలో విరివిగా సోలార్ (సౌర) విద్యుత్ ఉత్పత్తి చేసేందుకు ఉన్న అనుకూలతలు, సాంకేతిక అంశాలపై అధ్యయనం చేయడానికి ఓ ప్రత్యేక అంతర్జాతీయ స్థాయి కన్సల్టెంట్‌ను నియమించేందుకు కేబినెట్ ఆమోదం తెలిపింది. నీటి సంరక్షణతో పాటు ప్రాజెక్టు ప్రాంతంలోనే క్లీన్ ఎనర్జీ ఉత్పత్తి చేయడం ద్వారా రాష్ట్రానికి ఇంధన భద్రత సమకూరుతుందని ప్రభుత్వం వెల్లడించింది.