CM Revanth Reddy | 'స్కిల్స్ ఉన్నోడికే రెడ్ కార్పెట్'

Published: 14 Aug 2026 • 09:08 PM

* నర్సింగ్ చదివితే జపాన్, కొరియాలో ఉద్యోగాలు

ఆకేరు న్యూస్, హైదరాబాద్: తెలంగాణ రాష్ట్రంలోని లక్షలాది మంది విద్యార్థులు, వారి తల్లిదండ్రుల దశాబ్దాల నిరీక్షణకు చరమగీతం పాడుతూ ముఖ్యమంత్రి ఎ. రేవంత్ రెడ్డి అత్యంత కీలకమైన మరియు చారిత్రాత్మకమైన ప్రకటన చేశారు. ఇకపై ఫీజు రీయింబర్స్‌మెంట్ నిధుల కోసం విద్యార్థులు ధర్నాలు చేయాల్సిన అవసరం లేకుండా, కళాశాలల చుట్టూ తిరగాల్సిన పనిలేకుండా ప్రతి ఏటా ముందస్తుగానే (అడ్వాన్స్‌గా) నేరుగా విద్యార్థుల బ్యాంకు ఖాతాల్లోనే నిధులను జమ చేస్తామని స్పష్టం చేశారు.

నెక్లెస్ రోడ్, హెచ్‌ఎమ్‌డీఏ (HMDA) గ్రౌండ్స్ ఎదురుగా నూతనంగా ఏర్పాటు చేసిన సామాజిక విప్లవకారులు, మహనీయులు జ్యోతిరావు పూలే, సావిత్రీబాయి పూలే విగ్రహాలను ఆవిష్కరించిన అనంతరం నిర్వహించిన భారీ బహిరంగ సభలో ముఖ్యమంత్రి ఈ కీలక వ్యాఖ్యలు చేశారు.

* ప్రతి ఏటా రూ. 2,400 కోట్లు..

కాలేజీ యాజమాన్యాలు ఫీజులు రాకపోవడం సాకుగా చూపి విద్యార్థుల ఒరిజినల్ సర్టిఫికెట్లను ఆపివేయడంపై సీఎం రేవంత్ తీవ్రంగా మండిపడ్డారు. విద్యార్థుల భవిష్యత్తుతో ఆడుకునే హక్కు ఏ యాజమాన్యానికీ లేదని తేల్చిచెప్పారు.

“విద్యార్థులు ప్రత్యేకంగా విన్నపాలు చేసుకోనవసరం లేదు. ఆన్‌లైన్‌లో దరఖాస్తు చేసుకున్న అర్హులైన ప్రతి విద్యార్థి ఖాతాలో నిధులు ముందుగానే సిద్ధంగా ఉంటాయి. ఈ విద్యా సంవత్సరం నుంచే ఈ పథకాన్ని పూర్తిగా ప్రక్షాళన చేసి, పారదర్శకంగా అమలు చేసేందుకు ఏటా రూ. 2,400 కోట్లను నేరుగా విద్యార్థుల ఖాతాల్లోనే జమ చేయడానికి ప్రభుత్వం నిర్ణయించింది” అని స్పష్టం చేశారు.

* సర్టిఫికెట్లు ఉంటే సరిపోదు..

మారుతున్న కాలానికి, మారుతున్న సాంకేతిక విప్లవానికి అనుగుణంగా విద్యార్థులు తమ నైపుణ్యాలను మెరుగుపరుచుకోవాలని ముఖ్యమంత్రి పిలుపునిచ్చారు. “ఒకప్పుడు ఇంజనీరింగ్, ఎంబీబీఎస్ సర్టిఫికెట్ ఉంటే ఉద్యోగాలు వచ్చేవి. కంప్యూటర్ సైన్స్ చదివితే అమెరికా వెళ్లేవారు. కానీ ఇప్పుడు ఆర్టిఫిషియల్ ఇంటెలిజెన్స్ (AI) ప్రభావం వల్ల ఐటీ నిపుణులు, గ్రాడ్యుయేట్ల ఉద్యోగాలకే ప్రమాదం ఏర్పడింది. ఈ సంక్షోభాన్ని అధిగమించాలంటే సాంకేతిక నైపుణ్యం తప్పనిసరి. నర్సరీ నుంచి 12వ తరగతి వరకు చదువుతో పాటు స్కిల్స్ నేర్పేలా విద్యా విధానాన్ని మారుస్తున్నాం. పాలిటెక్నిక్, ఏటీసీలు (ATCs), స్కిల్స్ యూనివర్సిటీ ద్వారా విద్యార్థులు గ్లోబల్ నైపుణ్యాలను అందుకోవాలి. మన ఆడపిల్లలు నర్సింగ్ విద్య పూర్తి చేసి ప్రావీణ్యం సంపాదిస్తే.. జపాన్, సౌత్ కొరియా వంటి అభివృద్ధి చెందిన దేశాల్లో రూ. 2 లక్షలకు పైగా జీతంతో ఉద్యోగాలు సిద్ధంగా ఉన్నాయి” అని వివరించారు.

* మెడల్ సాధిస్తే రూ. కోటి నగదు, సర్కారీ కొలువు..

చదువులోనే కాకుండా క్రీడల్లో ప్రతిభ చూపే మట్టిలో మాణిక్యాలను వెలికితీసేందుకు ‘యంగ్ ఇండియా స్పోర్ట్స్ యూనివర్సిటీ’ని అందుబాటులోకి తెస్తున్నట్లు వెల్లడించారు. జాతీయ, అంతర్జాతీయ స్థాయిలో, ముఖ్యంగా ఒలింపిక్స్ క్రీడల్లో దేశానికి, రాష్ట్రానికి పతకాలు తీసుకువచ్చే ప్రతిభావంతులకు రూ. 1 కోటి నగదు బహుమతితో పాటు నేరుగా ప్రభుత్వ ఉద్యోగాన్ని కల్పిస్తామని హామీ ఇచ్చారు. ఇటీవల ప్రభుత్వం నుంచి మద్దతు పొంది ప్రపంచ స్థాయిలో మెరిసిన వరల్డ్ బాక్సింగ్ ఛాంపియన్ నిఖత్ జరీన్, టీమిండియా క్రికెటర్ మహమ్మద్ సిరాజ్, పారాలింపిక్ విజేత దీప్తి జీవాంజిలను వేదికపై ఉదహరిస్తూ.. యువత క్రీడల్లో రాణించాలని కోరారు.

* ఇంటిగ్రేటెడ్ స్కూళ్లు..

సమాజంలో కుల, మత అంతరాలను రూపుమాపడమే లక్ష్యంగా ప్రభుత్వం ‘యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్’ విధానాన్ని తీసుకొచ్చిందని సీఎం రేవంత్ తెలిపారు. అన్ని వర్గాల పిల్లలు ఒకే చోట కలిసి చదువుకోవడమే నిజమైన సామాజిక న్యాయమని పేర్కొన్నారు.

జ్యోతిరావు పూలే, సావిత్రీబాయి పూలే విగ్రహాల ఆవిష్కరణ కేవలం జయంతి, వర్ధంతులకు దండలు వేయడానికి మాత్రమే కాదని, వారి ఆశయాలను స్ఫూర్తిగా తీసుకుని సామాజిక చైతన్యం వైపు అడుగులు వేయడానికేనని ముగించారు.

* ఈ కార్యక్రమంలో పాల్గొన్న ప్రముఖులు..

ఈ ఘనమైన విగ్రహావిష్కరణ మరియు భారీ బహిరంగ సభలో ఉప ముఖ్యమంత్రి మల్లు భట్టి విక్రమార్క, మంత్రులు దుద్దిళ్ల శ్రీధర్ బాబు, కొండా సురేఖ, పొన్నం ప్రభాకర్, వాకిటి శ్రీహరి, కాంగ్రెస్ సీనియర్ నేత అజహరుద్దీన్, ప్రభుత్వ సలహాదారులు కే. కేశవరావు, వి. హనుమంతరావు, టీపీసీసీ అధ్యక్షుడు మహేష్ కుమార్ గౌడ్, పలువురు ఎంపీలు, ఎమ్మెల్సీలు, ఎమ్మెల్యేలు మరియు వేలాది మంది విద్యార్థులు, పౌరులు పాల్గొన్నారు.