Minister Sridhar Babu | నిజామాబాద్ ఐటీ హబ్‌కు దిగ్గజ కంపెనీలు

Published: 11 Sep 2026 • 11:19 AM Updated: 11 Sep 2026 • 11:26 AM

* అసెంబ్లీలో మంత్రి శ్రీధర్ బాబు స్పష్టం

* మైక్రోసాఫ్ట్, టీసీఎస్, విప్రోలకు ఆహ్వానం

ఆకేరు న్యూస్, హైదరాబాద్ : తెలంగాణలోని ద్వితీయ శ్రేణి (టైర్-2) నగరాలకు సమాచార సాంకేతిక రంగాన్ని విస్తరించడమే లక్ష్యంగా కాంగ్రెస్ ప్రభుత్వం అడుగులు వేస్తోంది. అందులో భాగంగా నిజామాబాద్ జిల్లాలో ఏర్పాటు చేసిన ఐటీ హబ్‌లోకి అంతర్జాతీయ స్థాయి బహుళజాతి కంపెనీలను తీసుకువచ్చేందుకు అన్ని రకాల ప్రయత్నాలు చేస్తున్నామని ఐటీ, పరిశ్రమల శాఖ మంత్రి దుద్దిళ్ళ శ్రీధర్ బాబు రాష్ట్ర శాసనసభలో వెల్లడించారు.

శాసనసభ ప్రశ్నోత్తరాల సమయంలో నిజామాబాద్ ఐటీ హబ్ అభివృద్ధి, కంపెనీల రాక మరియు స్థానిక యువతకు ఉద్యోగావకాశాలపై అసెంబ్లీలో మంత్రి శ్రీధర్ బాబు మాట్లాడిన ప్రధాన అంశాలు..

* కార్యాలయాల ఏర్పాటుకు ఆహ్వానం..

నిజామాబాద్ ఐటీ హబ్ టవర్‌తో పాటు రాష్ట్రంలోని వివిధ టైర్-2 నగరాల్లో అందుబాటులోకి తీసుకొచ్చిన ఐటీ టవర్లలో తమ ప్రాంతీయ కార్యాలయాలను (Offices) ఏర్పాటు చేయాల్సిందిగా ప్రముఖ ఐటీ దిగ్గజ సంస్థలను కోరుతున్నామని మంత్రి స్పష్టం చేశారు.

* ప్రపంచ స్థాయి కంపెనీలతో సంప్రదింపులు

కాగ్నిజెంట్ (Cognizant), క్యాప్‌జెమిని (Capgemini), విప్రో (Wipro), మైక్రోసాఫ్ట్ (Microsoft), టెక్ మహీంద్రా (Tech Mahindra), టీసీఎస్ (TCS), ఆరాకిల్ (Oracle), ఇన్ఫోసిస్ (Infosys), హెచ్‌సీఎల్ (HCL) వంటి టాప్ గ్లోబల్ ఐటీ కంపెనీలను నిజామాబాద్ ఐటీ హబ్‌కు తీసుకురావడానికి పలుదఫాలుగా చర్చలు జరుపుతున్నట్లు సభకు వివరించారు.

* స్పందన ఆధారంగా ఉద్యోగాల అంచనా..

ప్రభుత్వం ఇచ్చిన ప్రతిపాదనలపై ఆయా దిగ్గజ కంపెనీలు ఆలోచన చేస్తామని తెలిపాయన్నారు. వారు సానుకూలంగా స్పందించి, వారి ఆసక్తిని వ్యక్తం చేస్తూ తుది ప్రతిపాదనలు సమర్పించిన వెంటనే నిజామాబాద్‌ ఐటీ హబ్ ద్వారా స్థానిక యువతకు లభించే ప్రత్యక్ష, పరోక్ష ఉద్యోగాల సంఖ్యపై ఒక స్పష్టమైన అంచనాకు రాగలమని మంత్రి తెలిపారు.

* స్థానిక యువతకే ప్రాధాన్యం..

నిజామాబాద్ జిల్లాలోని గ్రామీణ, పట్టణ ప్రాంత విద్యావంతులైన యువతకు వారి సొంత జిల్లాలోనే మంచి ఐటీ ఉద్యోగావకాశాలు కల్పించడమే ప్రభుత్వ ప్రాథమిక లక్ష్యమని, ఇందుకోసం సకల చర్యలు తీసుకుంటున్నామని శ్రీధర్ బాబు అసెంబ్లీ వేదికగా హామీ ఇచ్చారు.