KALESHWARAM THOLI EKADASHI | తొలి ఏకాదశి వేళ భారీ రద్దీ

Published: 25 Jul 2026 • 01:16 PM

* త్రివేణి సంగమంలో పుణ్యస్నానాలు ఆచరించిన వేలాదిమంది భక్తులు

ఆకేరు న్యూస్, కాళేశ్వరం:
తొలి ఏకాదశి పర్వదినాన్ని పురస్కరించుకుని ప్రముఖ పుణ్యక్షేత్రమైన జయ శంకర్ భూపాలపల్లి జిల్లాలోని కాళేశ్వరం శైవక్షేత్రం భక్తజనసంద్రంగా మారింది. ప్రసిద్ధ గోదావరి, ప్రాణహిత, అంతర్వాహిని సరస్వతీ నదుల ‘త్రివేణి సంగమం’ వద్ద శనివారం తెల్లవారుజాము నుంచే భక్తులు వేలాదిగా తరలివచ్చి పుణ్యస్నానాలు ఆచరించారు.

శాస్త్రోక్తంగా నదీ స్నానాలు ఆచరించిన అనంతరం భక్తులు శ్రీ కాళేశ్వర ముక్తీశ్వర స్వామివార్ల దర్శనానికి పోటెత్తారు. స్వామివారికి శ్రావణమాసానికి ముందు వచ్చే తొలి ఏకాదశి అత్యంత పవిత్రమైనది కావడంతో, ఉదయాన్నే ప్రత్యేక అభిషేకాలు, పూజలు నిర్వహించారు.

* ప్రత్యేక దర్శనాలు, ఆధ్యాత్మిక శోభ..

దర్శనం కోసం ఉదయం నుంచే భక్తులు క్యూలైన్లలో గంటల తరబడి వేచి ఉన్నారు. “హర హర మహాదేవ… శంభో శంకర…” నామస్మరణలతో కాళేశ్వర క్షేత్రం మారుమోగింది. స్వామివారితో పాటు శ్రీ శుభానంద దేవి అమ్మవారిని దర్శించుకుని భక్తులు ప్రత్యేక పూజలు సమర్పించారు.

* భక్తులకు ఏర్పాట్లు..

భక్తుల రద్దీని దృష్టిలో ఉంచుకుని దేవస్థానం అధికారులు, స్థానిక పోలీసులు మరియు మండల యంత్రాంగం విస్తృత ఏర్పాట్లు చేశారు. భక్తుల భద్రత కోసం త్రివేణి సంగమం పుష్కర ఘాట్ వద్ద ప్రత్యేక పోలీసు పహారా, లైఫ్‌గార్డులను అందుబాటులో ఉంచగా, క్యూలైన్లలో వేచి ఉన్న భక్తులకు అసౌకర్యం కలగకుండా తాగునీరు, మజ్జిగ మరియు ప్రసాద వితరణ చేపట్టారు.

ఈ ఏకాదశి సందర్భంగా తెలంగాణతో పాటు పొరుగు రాష్ట్రాలైన మహారాష్ట్ర, ఛత్తీస్‌గఢ్, ఆంధ్రప్రదేశ్ నుంచి కూడా భారీ సంఖ్యలో భక్తులు తరలిరావడంతో కాళేశ్వరంలో పండుగ వాతావరణం సంతరించుకుంది.