US Green Card Indians
ఆకేరు న్యూస్, హైదరాబాద్ :
ఒకప్పుడు సగటు భారతీయ ఐటీ నిపుణుడి కల.. ‘అమెరికా’. డాలర్ల సంపాదన, లగ్జరీ లైఫ్, అగ్రరాజ్యంలో స్థిరపడటం.. ఇవే లక్ష్యాలుగా వేలాది మంది టెక్కీలు అమెరికా ఫ్లైట్ ఎక్కేవారు. కానీ, ఇప్పుడా పరిస్థితులు వేగంగా మారుతున్నాయి. అమెరికా ఇచ్చే శాశ్వత నివాస హక్కు (గ్రీన్కార్డ్) సాధించడం ఇప్పుడు హిమాలయ పర్వతాన్ని అధిరోహించడం కంటే కష్టంగా మారింది. తాజాగా వస్తున్న కొత్త గ్రీన్కార్డ్ నిబంధనలు అటు విదేశీ నిపుణులకు, ఇటు అమెరికన్ కార్పొరేట్ కంపెనీలకు ముసలం తెచ్చిపెడుతున్నాయి. ఈ క్రమంలోనే అమెరికా పట్ల భారతీయుల్లో విరక్తి మొదలైంది.
* కొత్త గ్రీన్కార్డ్ రూల్స్- నిపుణుల కెరీర్కు బ్రేకులు!
అమెరికా ఇమ్మిగ్రేషన్ విభాగం అంతర్గతంగా తీసుకువస్తున్న మార్పులు భారతీయ ప్రొఫెషనల్స్ మెడకు ఉచ్చులా మారుతున్నాయి. కొత్త రూల్స్ ప్రకారం దరఖాస్తుల స్క్రూటినీ ప్రక్రియను మరింత క్లిష్టతరం చేస్తున్నారు. దీనివల్ల ఒక అప్లికేషన్ క్లియర్ కావడానికి పట్టే సమయం భారీగా పెరుగుతుంది.
హెచ్-1బి (H-1B) వీసాపై ఉండి, గ్రీన్కార్డ్ ప్రాసెస్లో ఉన్న ఉద్యోగులు సులభంగా కంపెనీలు మారడానికి లేదా ప్రమోషన్లు తీసుకోవడానికి ఈ కొత్త నిబంధనలు అడ్డుపడనున్నాయి. చట్టపరమైన చిక్కుల వల్ల ఐటీ నిపుణులు ఒకే కంపెనీలో, ఒకే జీతానికి ఏళ్ల తరబడి బానిసల్లా పని చేయాల్సిన పరిస్థితి వస్తోంది.
* విదేశీ టాలెంట్కు ‘నో’ చెప్పనున్న అమెరికన్ కంపెనీలు
ఇన్నాళ్లూ భారత్ లాంటి దేశాల నుంచి వచ్చే టాలెంట్ను నమ్ముకునే గూగుల్, మైక్రోసాఫ్ట్, మెటా వంటి దిగ్గజాలు ప్రపంచాన్ని శాసించాయి. కానీ, మారుతున్న నిబంధనల వల్ల ఇకపై విదేశీ నిపుణులను ఉద్యోగాల్లోకి తీసుకోవడానికి కంపెనీలు జంకనున్నాయి.కొత్త రూల్స్ ప్రకారం విదేశీ ఉద్యోగులకు కంపెనీలు గ్రీన్కార్డ్ స్పాన్సర్ చేయాలంటే ప్రభుత్వ ఫీజులు, లీగల్ అడ్వైజర్ల ఖర్చులు భారీగా భరించాల్సి ఉంటుంది. స్థానిక అమెరికన్లను కాదని విదేశీయులను ఎందుకు రిక్రూట్ చేసుకుంటున్నారో నిరూపించే పేపర్ వర్క్ మరింత సంక్లిష్టంగా మారనుంది. ప్రభుత్వ నిఘా, జరిమానాలకు భయపడి చిన్న, మీడియం రేంజ్ కంపెనీలు విదేశీ టాలెంట్ను రిక్రూట్ చేసుకోవడమే బంద్ చేసే యోచనలో ఉన్నాయి.
* అటు ఉద్యోగ.. ఇటు ఫ్యామిలీ.. ఇరువర్గాల్లోనూ తీవ్ర ఆందోళన
ఈ గ్రీన్కార్డ్ సంక్షోభం ఉద్యోగ ఆధారిత (Employment-Based), కుటుంబ ఆధారిత (Family-Based) దరఖాస్తుదారులను తీవ్ర ఇబ్బందుల్లోకి నెట్టేస్తోంది. దేశాల వారీగా ఉన్న 7 శాతం కోటా పరిమితి కారణంగా భారతీయులకు గ్రీన్కార్డ్ రావడానికి శతాబ్దం (100 ఏళ్లు) పైగా పడుతుందని నివేదికలు చెబుతున్నాయి. ఈ లోపే వీసా గడువు ముగిసిపోవడం, కంపెనీలు లేఆఫ్స్ ప్రకటించడంతో భారతీయ కుటుంబాలు రోడ్డున పడుతున్నాయి. అమెరికాలో స్థిరపడిన వారు తమ తల్లిదండ్రులను, జీవిత భాగస్వాములను అక్కడికి రప్పించుకోవడానికి చేసే దరఖాస్తులు ఫైళ్లలోనే మగ్గిపోతున్నాయి. డాక్యుమెంట్ల వెరిఫికేషన్ పేరుతో ఏళ్ల తరబడి జాప్యం చేస్తుండటంతో కుటుంబాలు విడివిడిగా గడపాల్సి వస్తోంది.
* ఆందోళనకరమైన ‘ఏజ్-అవుట్’ (Age-out) శాపం
గ్రీన్కార్డ్ క్యూలో దశాబ్దాలు గడిచిపోతుండటంతో, హెచ్-1బి ఉద్యోగుల పిల్లలకు 21 ఏళ్లు నిండిపోతున్నాయి. అమెరికా చట్టాల ప్రకారం 21 ఏళ్లు దాటితే వారు డిపెండెంట్ వీసాకు అనర్హులు. దీనివల్ల అమెరికాలోనే పుట్టి పెరిగిన భారతీయ పిల్లలు, చదువు పూర్తయ్యాక అక్కడే ఉండే అవకాశం లేక బలవంతంగా ఇండియాకు తిరిగి రావాల్సి వస్తోంది.
* అమెరికా వద్దు బాబోయ్.. భారతీయుల్లో మొదలైన విసుగు
నిరంతర వీసా టెన్షన్లు, గ్రీన్కార్డ్ ఎప్పుడు వస్తుందో తెలియని అనిశ్చితితో భారతీయుల్లో అమెరికా పట్ల తీవ్ర అసంతృప్తి, విసుగు మొదలయ్యాయి. అమెరికా వీసా కష్టాలు పడేకంటే, సులభంగా పీఆర్ (శాశ్వత నివాసం) ఇచ్చే కెనడా, బ్రిటన్, జర్మనీ, ఆస్ట్రేలియా వంటి దేశాలకు వెళ్లడమే బెటర్ అని నేటి తరం యువత భావిస్తోంది.
* రివర్స్ మైగ్రేషన్ (Reverse Migration)
అమెరికాలో గ్రీన్కార్డ్ కోసం నరకం చూడటం కంటే, శరవేగంగా దూసుకుపోతున్న స్వదేశానికి (భారతదేశానికి) తిరిగి వచ్చి స్టార్టప్లు పెట్టడం లేదా కార్పొరేట్ కంపెనీల్లో టాప్ పొజిషన్లలో స్థిరపడటం మిన్న అని ఎంతోమంది సీనియర్ నిపుణులు డిసైడ్ అవుతున్నారు.
అమెరికా ఆర్థిక వ్యవస్థను నిలబెట్టడంలో భారతీయ మేధోసంపత్తిది కీలక పాత్ర. కానీ, ప్రస్తుత సంకుచిత ఇమ్మిగ్రేషన్ విధానాలు ఆ టాలెంట్కు చెక్ పెట్టేలా ఉన్నాయి. అమెరికా ప్రభుత్వం తక్షణమే గ్రీన్కార్డ్ కోటాలను సవరించకపోతే, రాబోయే రోజుల్లో గ్లోబల్ టాలెంట్ అంతా భారత్ వైపు లేదా ఇతర ప్రత్యామ్నాయ దేశాల వైపు మళ్లడం ఖాయంగా కనిపిస్తోంది.
About the Author
