Epic First Semester Pre release event
* విజయ్ దేవరకొండ, సందీప్ రెడ్డి వంగా ప్రశంసలు
* ఫ్యామిలీతో హ్యాపీగా చూసే సినిమా – నిర్మాత నాగవంశీ
ఆకేరు న్యూస్, హైదరాబాద్: ఆనంద్ దేవరకొండ, వైష్ణవి చైతన్య జంటగా నటించిన యూత్ఫుల్ ఎంటర్టైనర్ ‘ఎపిక్ – ఫస్ట్ సెమిస్టర్’. ‘90s’ వెబ్ సిరీస్తో ప్రేక్షకుల ఆదరణ పొందిన ఆదిత్య హాసన్ ఈ సినిమాతో వెండితెరకు దర్శకుడిగా పరిచయం అవుతున్నారు. శ్రీకర స్టూడియోస్ సమర్పణలో సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య నిర్మించారు. సెప్టెంబర్ 11న ఈ సినిమా థియేటర్లలోకి రానుంది. ఈ సందర్భంగా హైదరాబాద్లోని దస్పల్లా హోటల్లో ప్రీరిలీజ్ వేడుక నిర్వహించారు. రౌడీ స్టార్ విజయ్ దేవరకొండ, దర్శకుడు సందీప్ రెడ్డి వంగా ముఖ్య అతిథులుగా హాజరయ్యారు.
* ఆనంద్ ఫిల్మోగ్రఫీలో బ్యూటిఫుల్ సినిమా
విజయ్ దేవరకొండ మాట్లాడుతూ.. ఎపిక్ తో ఈ ఏడాది వరుస విజయాలు మొదలవుతాయని ఆకాంక్షించారు. ‘90s’ వెబ్ సిరీస్ చూసినప్పుడే ఆదిత్య హాసన్ సినిమా తీస్తే తప్పకుండా చూడాలని అనుకున్నానని చెప్పారు. షార్ట్ ఫిలిమ్స్ చూసి తరుణ్ భాస్కర్ తొలి సినిమా కోసం ఎలా ఎదురుచూశానో.. ఆదిత్య తొలి సినిమా కోసం కూడా అలాగే ఎదురుచూశానన్నారు. ఆనంద్ సినిమాల ఎంపిక తనకు ఎంతో గర్వంగా ఉంటుందని, ఎపిక్ అతని ఫిల్మోగ్రఫీలో ఒక బ్యూటిఫుల్ సినిమాగా నిలుస్తుందని విజయ్ దేవరకొండ అన్నారు. వైష్ణవి బ్రిలియంట్ యాక్టర్ అని ప్రశంసించారు. ‘90s’ తనకు ఎన్నో జ్ఞాపకాలను గుర్తు చేసిందని, ఎపిక్ కూడా భారీ విజయం సాధిస్తుందని నమ్ముతున్నట్లు తెలిపారు.
* ఆదిత్య రచన అద్భుతం
సందీప్ రెడ్డి వంగా మాట్లాడుతూ.. ఆనంద్తో తనకు చాలా కాలం నుంచి పరిచయం ఉందని గుర్తుచేసుకున్నారు. ఐటీ ఉద్యోగం చేస్తున్న సమయంలో కూడా ఆనంద్కు సినిమాలపై ఎంతో ఆసక్తి ఉండేదని తెలిపారు. ‘దొరసాని’, ‘మిడిల్ క్లాస్ మెలోడీస్’, ‘బేబీ’ చిత్రాల్లో ఆనంద్ సహజంగా పాత్రల్లో ఒదిగిపోయాడని ప్రశంసించారు. ‘90s’ సిరీస్ను మొదట పిల్లలతో కలిసి చూసినప్పటికీ.. ఆ తర్వాత తాను కూడా సిరీస్ను ఆస్వాదించానని చెప్పారు. ఆదిత్య హాసన్ రచన అనుభవం ఉన్న రచయిత రాసినట్టుగా అనిపించిందని, ‘ఎపిక్’ టీజర్, ట్రైలర్ కూడా తనకు నచ్చాయని తెలిపారు. సెప్టెంబర్ 11న విడుదల కానున్న ఈ సినిమా ఘన విజయం సాధించాలని కోరుకున్నారు.
* మనందరి సినిమా
ఆనంద్ దేవరకొండ మాట్లాడుతూ.. ‘ఎపిక్’ మనందరి సినిమా అని అన్నారు. 23 నుంచి 26 ఏళ్ల వయసులో కుటుంబం, ప్రేమ, బాధ్యతల గురించి యువతలో ఉండే ఆలోచనలను ఈ కథ ప్రతిబింబిస్తుందని చెప్పారు. ఎలాంటి ట్విస్టులు, రక్తపాతాలు లేకుండా ఇద్దరు వ్యక్తులు కూర్చొని మాట్లాడుకునే మంచి ప్రేమకథగా సినిమా ఉంటుందని తెలిపారు. చాలా సహజంగా సాగే ఈ కథలో ప్రతి ఒక్కరూ తమను తాము చూసుకుంటారని అన్నారు. ‘కింగ్డమ్’ సినిమాలోని ‘అన్న అంటేనే’ పాట తన కోసం, విజయ్ అన్న కోసం రాసినట్లుగా అనిపిస్తుందని ఆనంద్ చెప్పారు. విజయ్ వల్ల తమ కుటుంబంలోని అందరి జీవితాలు మారిపోయాయని తెలిపారు. నిజ జీవితంలోని కొన్ని సంఘటనలు ఎపిక్ లో కనిపిస్తాయని చెప్పారు.
సినిమాలో విలన్ ఉండడని, ఫ్రెండ్స్, గర్ల్ఫ్రెండ్, ఫ్యామిలీ ఎవరితో వెళ్లినా సరదాగా ఎంజాయ్ చేసేలా సినిమా ఉంటుందని ఆనంద్ తెలిపారు. సెప్టెంబర్ 10న ప్రీమియర్స్ ఉంటాయని చెప్పారు.
* కడలి పాత్రలో వైష్ణవి
వైష్ణవి చైతన్య మాట్లాడుతూ.. విజయ్ దేవరకొండ, సందీప్ రెడ్డి వంగా ఈ వేడుకకు రావడం ఆనందంగా ఉందన్నారు. సందీప్ రెడ్డి వంగా సినిమాలు, అందులోని పాత్రలంటే తనకు ఎంతో అభిమానమని చెప్పారు. ఎపిక్ లో కడలి అనే పాత్రలో నటించానని, కడలి అంటే సముద్రమని తెలిపారు. ఎలా స్ట్రాంగ్గా ఉండాలి, కాన్ఫిడెంట్గా ఉండాలి, మన కోసం మనం ఎలా నిలబడాలి అనే విషయాలను కడలి పాత్ర ద్వారా నేర్చుకున్నానన్నారు. ఆనంద్ ప్రతి పాత్రలోనూ నిజాయితీ కనిపిస్తుందని, ఈ సినిమాలో కూడా అది స్పష్టంగా కనిపిస్తుందని చెప్పారు. తనకు అవకాశం ఇచ్చిన సితార ఎంటర్టైన్మెంట్స్, దర్శకుడు ఆదిత్య హాసన్కు కృతజ్ఞతలు తెలిపారు.
* ఫ్యామిలీతో హ్యాపీగా చూడొచ్చు
నిర్మాత సూర్యదేవర నాగవంశీ మాట్లాడుతూ.. ట్రైలర్కు మంచి స్పందన వచ్చిందని తెలిపారు. ‘90s’ దర్శకుడి నుంచి ఇలాంటి కంటెంట్ను కొందరు ఊహించలేదని సోషల్ మీడియాలో వచ్చిన కామెంట్స్పై స్పందించారు. అబ్బాయి, అమ్మాయి మధ్య ప్రేమ, బంధాన్ని దర్శకుడు ఆదిత్య ఎంతో స్వచ్ఛంగా చూపించారని అన్నారు. సాధారణ సినిమాల్లో కనిపించే కుటుంబ సమస్యలకు భిన్నంగా.. ఒక అబ్బాయి, అమ్మాయి మధ్య ఆచరణాత్మకంగా ఎదురయ్యే సమస్యలను ఇందులో చూపించామని తెలిపారు.
గర్ల్ఫ్రెండ్, భార్య, అమ్మ.. ఎవరితో సినిమాకు వెళ్లినా ఎంజాయ్ చేసేలా ఉంటుందని, తల్లిదండ్రులతో వచ్చే చిన్న చిన్న మనస్పర్థలు కూడా ఇందులో కనిపిస్తాయని చెప్పారు. దాదాపు 2 గంటల 20 నిమిషాల నిడివి ఉన్న సినిమాలో సుమారు 1 గంట 40 నిమిషాలు ఆనంద్, వైష్ణవి పాత్రలు మాట్లాడుకుంటూ ఉంటాయని తెలిపారు. ఆ సంభాషణలకు ప్రేక్షకులు ఎంతగా కనెక్ట్ అయితే సినిమా అంత పెద్ద స్థాయికి వెళ్తుందని నాగవంశీ అన్నారు. రూరల్ తెలంగాణ నుంచి వచ్చిన ఓ సాఫ్ట్ అబ్బాయి, కాన్ఫిడెంట్ అమ్మాయి ప్రేమలో పడితే ఎలా ఉంటుందనేది దర్శకుడు అద్భుతంగా చూపించారని చెప్పారు. మన జీవిత భాగస్వామిని ఎలా చూసుకోవాలనే అంశం కూడా సినిమాలో ఉంటుందని తెలిపారు. ఫ్యామిలీతో హ్యాపీగా వెళ్లి చూసే సినిమా ఇదని అన్నారు.
* నమ్మకాన్ని నిలబెడతా
దర్శకుడు ఆదిత్య హాసన్ మాట్లాడుతూ.. ‘90s’, ‘ప్రేమలు’ సమయంలో తనను ప్రశంసించిన వారే ‘ఎపిక్’ ట్రైలర్ చూసిన తర్వాత భిన్నమైన కామెంట్స్ చేయడం చూసి ఆశ్చర్యపోయానన్నారు. అయితే ప్రేక్షకులు, రివ్యూవర్స్ తనపై ఉంచిన నమ్మకం తనకు ఎంతో సంతోషాన్ని ఇచ్చిందని చెప్పారు. తనపై ప్రేక్షకులు పెట్టుకున్న నమ్మకాన్ని నిజం చేస్తూ, అందరినీ సంతృప్తిపరిచేలా ‘ఎపిక్’ ఉంటుందని తెలిపారు. విజయ్ దేవరకొండ, సందీప్ రెడ్డి వంగా సినిమాలు, అందులోని పాత్రలంటే తనకు ఎంతో అభిమానమని చెప్పారు. తాను చూసిన సమాజం నుంచే ఎపిక్ కథ పుట్టిందని, ఆనంద్ తన పాత్రకు పూర్తి న్యాయం చేశారని అన్నారు. కడలి పాత్రను పోషించిన వైష్ణవికి, సినిమాతో భాగమైన ప్రతి ఒక్కరికీ కృతజ్ఞతలు తెలిపారు.
* ప్రతి జనరేషన్కు కనెక్ట్ అవుతుంది
నటుడు శివాజీ మాట్లాడుతూ.. ‘ఎపిక్’ ప్రతి జనరేషన్కు సంబంధించిన కథ అని అన్నారు. మానవ జీవితంలో భావోద్వేగాలకు వయసుతో సంబంధం లేదని, జీవితం జ్ఞాపకాలు, సినిమా భావోద్వేగాల సమ్మేళనమే ఎపిక్ అని పేర్కొన్నారు. థియేటర్కు వచ్చిన ప్రతి ఒక్కరూ ఇందులో తమ కథను చూసుకుంటారని, సినిమాలోని ప్రతి పాత్ర గుర్తుండిపోతుందని అన్నారు. ఆనంద్ పోషించిన ఆదిత్య పాత్ర చాలా కష్టమైనదని, వైష్ణవి కూడా అద్భుతంగా నటించిందని ప్రశంసించారు.
సంగీత దర్శకుడు హేషమ్ అబ్దుల్ వహాబ్ మాట్లాడుతూ.. ‘ఎపిక్’ తనకు చాలా ప్రత్యేకమైన సినిమా అని తెలిపారు. సంగీత దర్శకుడిగా తనలోని కొత్త కోణాన్ని చూపించే చిత్రమిదని అన్నారు. ఈ ప్రయాణంలో నాగవంశీ, ఆదిత్య, ఆనంద్, వైష్ణవి అందించిన సహకారాన్ని ఎప్పటికీ మర్చిపోలేనని చెప్పారు.
ఈ కార్యక్రమంలో యాంకర్ సుమ కనకాల వ్యాఖ్యాతగా వ్యవహరించగా.. నటుడు శ్రీనివాస్ గవిరెడ్డి, సినిమాటోగ్రాఫర్ అజీమ్, గీత రచయితలు సురేష్ బనిశెట్టి, పూర్ణాచారి తదితరులు పాల్గొన్నారు. ‘ఎపిక్ – ఫస్ట్ సెమిస్టర్’ సెప్టెంబర్ 11న థియేటర్లలో విడుదల కానుంది.
About the Author
Please tell us what is wrong. Your report will be sent to the website team.
