GWMC Commissioner T. Venkanna | వరంగల్‌కు ఆధునిక టెక్నాలజీ

Published: 11 Sep 2026 • 07:46 PM

* యూజీడీపై కమిషనర్‌ పరిశీలన

* మురుగునీటి శుద్ధిపై దృష్టి

ఆకేరు న్యూస్, వరంగల్: భవిష్యత్ అవసరాలకు అనుగుణంగా వరంగల్ నగరాన్ని పరిశుభ్రంగా, పర్యావరణహితంగా, సుస్థిరంగా తీర్చిదిద్దేందుకు ఆధునిక సాంకేతికతలను వినియోగించనున్నట్లు గ్రేటర్ వరంగల్ మున్సిపల్ కార్పొరేషన్ కమిషనర్ టి. వెంకన్న తెలిపారు. ముంబైలో నిర్వహించిన IFAT India 2026 మూడు రోజుల ప్రదర్శన చివరి రోజైన శుక్రవారం ఆయన పాల్గొని వివిధ ఆధునిక సాంకేతిక పరిజ్ఞానాలను పరిశీలించారు.

* యూజీడీకి ఆధునిక టెక్నాలజీ

మంచినీటి సరఫరా, ఘన వ్యర్థాల నిర్వహణ, మురుగునీటి శుద్ధి, సీవరేజ్ నిర్వహణకు సంబంధించిన నూతన విధానాలను కమిషనర్ పరిశీలించారు. ముఖ్యంగా త్వరలో చేపట్టనున్న అండర్‌గ్రౌండ్ డ్రైనేజీ (యూజీడీ) వ్యవస్థకు ఉపయోగపడే ఆధునిక సీవరేజ్ సాంకేతికతలపై వివరాలు తెలుసుకున్నారు.

* వ్యర్థాల నిర్వహణపై పరిశీలన

మురుగునీటిని సమర్థవంతంగా సేకరించి శుద్ధి చేయడం, తిరిగి వినియోగించడం ద్వారా పారిశుధ్య ప్రమాణాలను మెరుగుపరచడంతో పాటు పర్యావరణాన్ని పరిరక్షించవచ్చని కమిషనర్ పేర్కొన్నారు. యూజీడీలో భాగంగా సాలిడ్ వేస్ట్ మేనేజ్‌మెంట్, సెప్టిక్ ట్యాంకులు, ఇన్‌స్పెక్షన్ ఛాంబర్లు, పైప్‌లైన్ అనుసంధాన విధానాలను కూడా పరిశీలించినట్లు తెలిపారు.

* పైపుల సాంకేతికతల అధ్యయనం

ఆస్ట్రల్, సిన్‌టెక్స్ తదితర పైపుల తయారీ సంస్థలు ప్రదర్శించిన ఆధునిక సాంకేతిక విధానాలను కమిషనర్ అధ్యయనం చేశారు. వరంగల్ నగర అవసరాలు, స్థానిక పరిస్థితులకు అనుగుణంగా ఉపయోగకరమైన సాంకేతికతలను ఎంపిక చేసి వినియోగించేందుకు చర్యలు తీసుకుంటామని తెలిపారు.

* సాంకేతిక పాలనకు ప్రాధాన్యం

బిల్లింగ్ యంత్రాల్లో అందుబాటులోకి వచ్చిన ఆధునిక సాంకేతిక పరికరాల వినియోగంపై కూడా అవగాహన పొందినట్లు కమిషనర్ చెప్పారు. నగర పాలనలో టెక్నాలజీని విస్తృతంగా వినియోగించడం ద్వారా ప్రజలకు సేవలను వేగంగా, పారదర్శకంగా, సమర్థవంతంగా అందించవచ్చని పేర్కొన్నారు.

ఈ ఎక్స్‌పో ద్వారా అత్యాధునిక సాంకేతికతల పనితీరు, వినియోగం, నగర అవసరాలకు వాటిని అన్వయించే విధానాలపై అవగాహన కలిగిందని వెంకన్న తెలిపారు. ప్రజలకు మెరుగైన మౌలిక సదుపాయాలు కల్పించడంతో పాటు వనరుల సంరక్షణ, పర్యావరణ పరిరక్షణకు ప్రాధాన్యం ఇస్తామని చెప్పారు.

ఈ కార్యక్రమంలో తెలంగాణ రాష్ట్ర సీడీఎంఏ జాయింట్ డైరెక్టర్ ఫల్గుణ్ కుమార్‌తో పాటు కరీంనగర్, ఖమ్మం, రామగుండం మున్సిపల్ కమిషనర్లు ప్రపుల్ దేశాయ్, అభిషేక్ అగస్త్య, జల్ద అరుణ కుమారి తదితర అధికారులు పాల్గొన్నారు.