Minister Sridhar Babu | పరిశ్రమలకు భూములు

Published: 12 Sep 2026 • 03:32 PM

* 47 కంపెనీలకు 229 ఎకరాలు

* ల్యాండ్‌ పూలింగ్‌పై ప్రభుత్వం దృష్టి

* మంత్రి శ్రీధర్‌బాబు

ఆకేరు న్యూస్, హైదరాబాద్‌: రాష్ట్రంలో పారిశ్రామిక రంగాన్ని మరింత అభివృద్ధి చేసి, భారీగా పెట్టుబడులను ఆకర్షించేందుకు ప్రభుత్వం చర్యలు చేపడుతోందని పరిశ్రమల శాఖ మంత్రి శ్రీధర్‌బాబు తెలిపారు. ఇప్పటివరకు రాష్ట్రంలో 47 కంపెనీలకు భూములు కేటాయించినట్లు ఆయన వెల్లడించారు. వీటిలో 12 కంపెనీలు ఇప్పటికే కార్యకలాపాలు ప్రారంభించాయని తెలిపారు.

* 229 ఎకరాల్లో రూ.2,104 కోట్ల పెట్టుబడులు

పరిశ్రమల కోసం కేటాయించిన మొత్తం 229 ఎకరాల భూమిలో రూ.2,104 కోట్ల పెట్టుబడులు వచ్చినట్లు మంత్రి తెలిపారు. ఆయా కంపెనీలు సుమారు 8,321 మందికి ఉపాధి కల్పిస్తామని హామీ ఇచ్చినట్లు వెల్లడించారు. రాష్ట్రానికి పెట్టుబడులను తీసుకురావడంతో పాటు స్థానికంగా ఉద్యోగ, ఉపాధి అవకాశాలను పెంచడమే ప్రభుత్వ ప్రధాన లక్ష్యమని శ్రీధర్‌బాబు పేర్కొన్నారు.

* భూసేకరణకు ల్యాండ్‌ పూలింగ్‌పై ఆలోచన

పరిశ్రమల ఏర్పాటుకు అవసరమైన భూసేకరణలో కొన్ని ఇబ్బందులు ఎదురవుతున్నాయని మంత్రి తెలిపారు. భూసేకరణ సమస్యలను గత ప్రభుత్వాలు కూడా ఎదుర్కొన్నాయని ఆయన పేర్కొన్నారు. ఈ సమస్యకు పరిష్కారంగా ల్యాండ్‌ పూలింగ్‌ విధానాన్ని తీసుకురావడంపై ప్రభుత్వం ఆలోచిస్తున్నట్లు తెలిపారు.

ల్యాండ్‌ పూలింగ్‌ ద్వారా పరిశ్రమలకు అవసరమైన భూమిని సమీకరించి, పెట్టుబడులకు అనుకూల వాతావరణాన్ని కల్పించే అంశాన్ని పరిశీలిస్తున్నట్లు మంత్రి వెల్లడించారు. రాష్ట్రానికి మరిన్ని పరిశ్రమలు, పెట్టుబడులను తీసుకురావడంతో పాటు యువతకు పెద్ద ఎత్తున ఉద్యోగ, ఉపాధి అవకాశాలు కల్పించేందుకు ప్రభుత్వం ప్రాధాన్యత ఇస్తోందని శ్రీధర్‌బాబు తెలిపారు.