Errabelli Dayakar Rao, SRSP Water Release Warangal
* నెలాఖరులోగా నీళ్లు ఇవ్వకపోతే హైదరాబాద్లో ధర్నా
ఆకేరు న్యూస్, వరంగల్:
వరంగల్ జిల్లా పర్వతగిరి మండల పరిధిలోని మోత్యా తండా గ్రామపంచాయతీకి చెందిన సిత్య తండాలో ఎండిపోయిన వరి పంటలను, ఎస్ఆర్ఎస్పీ (SRSP) కెనాల్ను మాజీ మంత్రి ఎర్రబెల్లి దయాకర్రావు సోమవారం నేరుగా క్షేత్రస్థాయిలో పరిశీలించారు. ఈ సందర్భంగా స్థానిక రైతులు, మహిళలు తమ పొలాలకు నీరందక పంటలు ఎండిపోతున్న తీరును ఆయన దృష్టికి తీసుకెళ్లి తీవ్ర ఆవేదన వ్యక్తం చేశారు. తక్షణమే ఎస్ఆర్ఎస్పీ కెనాల్ ద్వారా నీటిని విడుదల చేసి, స్థానిక చెరువులను నింపి పంటలను కాపాడాలని విజ్ఞప్తి చేశారు.
రైతుల సమస్యలను ఆలకించిన అనంతరం ఎర్రబెల్లి దయాకర్రావు విలేకరులతో మాట్లాడుతూ ప్రస్తుత ప్రభుత్వంపై తీవ్ర స్థాయిలో విరుచుకుపడ్డారు. గతంలో కేసీఆర్ హయాంలో రైతాంగానికి ఎలాంటి ఢోకా లేకుండా రెండు పంటలకు సరిపడా సాగునీటిని సమృద్ధిగా అందించామని గుర్తుచేశారు. కానీ, నేటి కాంగ్రెస్ ప్రభుత్వం రైతుల ఇబ్బందులను, సాగునీటి ఎద్దడిని పూర్తిగా విస్మరించిందని విమర్శించారు.
ఈ నెలాఖరులోగా ఎస్ఆర్ఎస్పీ కెనాల్ నుంచి సకాలంలో నీటిని విడుదల చేయకపోతే, బాధితులైన రైతులతో కలిసి రాజధాని హైదరాబాద్లో బృహత్ ధర్నా కార్యక్రమాన్ని నిర్వహిస్తామని ప్రభుత్వాన్ని తీవ్రంగా హెచ్చరించారు. రైతాంగ ప్రయోజనాల కోసం ఎంతటి పోరాటానికైనా వెనుకాడేది లేదని ఆయన స్పష్టం చేశారు. ఈ కార్యక్రమంలో స్థానిక ప్రజాప్రతినిధులు, రైతు నాయకులు, గ్రామస్థులు పెద్ద సంఖ్యలో పాల్గొన్నారు.
About the Author
Please tell us what is wrong. Your report will be sent to the website team.
