IND vs ZIM T20 | నేడు హరారేలో భారత్-జింబాబ్వే రెండో టీ20

Published: 25 Jul 2026 • 02:05 PM

* ప్రభ్‌సిమ్రన్‌కు ఛాన్స్?

* గెలిస్తే మరో మ్యాచ్ మిగిలి ఉండగానే సిరీస్ సొంతం

ఆకేరు న్యూస్, డెస్క్:

జింబాబ్వేపై తొలి టీ20లో అద్భుత విజయాన్ని నమోదు చేసిన టీమిండియా.. అదే జోరును రెండో మ్యాచ్‌లోనూ కొనసాగించాలని భావిస్తోంది. హరారే వేదికగా నేడు జరిగే రెండో టీ20లో విజయం సాధిస్తే మరో మ్యాచ్ మిగిలి ఉండగానే సిరీస్‌ను భారత్ కైవసం చేసుకోనుంది.

* అభిషేక్ శర్మపై వేటు?

తొలి మ్యాచ్‌లో ఓపెనర్ అభిషేక్ శర్మ ఒక్క పరుగు మాత్రమే చేసి నిరాశపరిచాడు. దీంతో రెండో టీ20లో అతడిని తుది జట్టు నుంచి తప్పించే అవకాశాలు ఉన్నట్లు సమాచారం.

* ప్రభ్‌సిమ్రన్‌కు అవకాశం?

అభిషేక్ స్థానంలో ప్రభ్‌సిమ్రన్ సింగ్ కు అవకాశం దక్కే అవకాశం ఉందని వార్తలు వినిపిస్తున్నాయి. అలా జరిగితే వైభవ్ సూర్యవంశీ-ప్రభ్‌సిమ్రన్ సింగ్ ఓపెనింగ్ జోడీగా బరిలోకి దిగే అవకాశం ఉంది. దీంతో జట్టుకు కుడిచేతి-ఎడమచేతి బ్యాటర్ల కలయిక కూడా లభించనుంది.

* వైభవ్‌పై మరోసారి అంచనాలు

తొలి టీ20లో కేవలం 18 బంతుల్లోనే అర్ధశతకం బాదిన వైభవ్ సూర్యవంశీ.. అంతర్జాతీయ టీ20ల్లో అత్యంత పిన్న వయసులో హాఫ్ సెంచరీ సాధించిన బ్యాటర్‌గా నిలిచాడు. రెండో మ్యాచ్‌లోనూ అదే దూకుడు కొనసాగించాలని అభిమానులు ఆశిస్తున్నారు.

* బ్యాటింగ్‌లో పెద్ద మార్పులు లేవు

ఓపెనింగ్‌లో మార్పు జరిగితే తప్ప మిగతా బ్యాటింగ్ ఆర్డర్‌లో మార్పులు ఉండే అవకాశం కనిపించడం లేదు. ఇషాన్ కిషన్, కెప్టెన్ శ్రేయస్ అయ్యర్, తిలక్ వర్మ, రింకూ సింగ్, శివమ్ దూబే తమ స్థానాలను కొనసాగించే అవకాశం ఉంది.

* అదే బౌలింగ్ కాంబినేషన్

తొలి టీ20లో విజయవంతమైన బౌలింగ్ దళాన్నే రెండో మ్యాచ్‌లోనూ కొనసాగించే అవకాశాలు ఉన్నాయి. వరుసగా రెండో విజయంతో సిరీస్‌ను ముందుగానే ఖాయం చేయాలనే లక్ష్యంతో టీమిండియా బరిలోకి దిగుతోంది.