Human Rights Commission | కలెక్టర్‌కు సీరియస్ నోటీసులు

Published: 04 Aug 2026 • 08:18 PM Updated: 04 Aug 2026 • 08:34 PM

* 27 మంది విద్యార్థినుల అస్వస్థత

ఆకేరు న్యూస్, హైదరాబాద్:

వరంగల్ జిల్లా వర్ధన్నపేట నియోజకవర్గ కేంద్రంలోని ప్రభుత్వ ఎస్టీ బాలికల వసతి గృహంలో కలుషిత ఆహారం (ఫుడ్ పాయిజన్) తిని 27 మంది విద్యార్థినులు తీవ్ర అస్వస్థతకు గురైన విషాదకర ఘటనపై తెలంగాణ రాష్ట్ర మానవ హక్కుల కమిషన్ (TGHRC) అత్యంత తీవ్రంగా స్పందించింది. ప్రభుత్వ వసతి గృహాల్లో విద్యార్థుల ఆరోగ్య భద్రత, ఆహార నాణ్యత పట్ల నిర్లక్ష్యం వహించడంపై తీవ్ర అసంతృప్తి వ్యక్తం చేసిన కమిషన్, ఈ ఘటనపై స్వయంచాలకంగా (Suo-Motu) కేసు నమోదు చేసుకుని అధికారిక విచారణకు ఆదేశించింది.

గౌరవ తెలంగాణ మానవ హక్కుల కమిషన్ ఛైర్‌పర్సన్ డాక్టర్ జస్టిస్ షమీమ్ అక్తర్ ఆదేశాల మేరకు ఈ సుమోటో కేసు నమోదైంది. పేద విద్యార్థినులు నివసించే ప్రభుత్వ హాస్టళ్లలో పారిశుద్ధ్య లోపం, నాసిరకం ఆహారం అందించడం ప్రాథమిక మానవ హక్కుల ఉల్లంఘన కిందకే వస్తుందని కమిషన్ స్పష్టం చేసింది. నాణ్యమైన ఆహారం, మౌలిక వసతులు కల్పించాల్సిన బాధ్యత యంత్రాంగంపై ఉందనే విషయాన్ని గుర్తుచేసింది.

* వరంగల్ జిల్లా కలెక్టర్‌కు ఆదేశాలు…

ఈ ఘటనకు గల పూర్తి కారణాలను వెలికితీయడంతో పాటు, నిర్లక్ష్యంగా వ్యవహరించిన బాధ్యులపై కఠిన చర్యలు తీసుకోవాలని కమిషన్ నిర్ణయించింది. ఈ మేరకు వరంగల్ జిల్లా కలెక్టర్‌కు అధికారిక నోటీసులు జారీ చేస్తూ, సెప్టెంబర్ 7, 2026 నాటికి పూర్తి స్థాయి సమగ్ర నివేదికను సమర్పించాలని స్పష్టమైన ఉత్తర్వులు ఇచ్చింది.

* జిల్లా కలెక్టర్ తన నివేదికలో ఈ క్రింది అంశాలను స్పష్టంగా పొందుపరచాలని కమిషన్ సూచించింది.

వసతి గృహంలో ఆహారం ఏ విధంగా కలుషితమైంది? ఘటన జరిగిన రోజు విద్యార్థినులకు వడ్డించిన భోజనం తయారీలో జరిగిన పొరపాట్లు మరియు దానికి దారితీసిన పరిస్థితులు.

అస్వస్థతకు గురైన మొత్తం 27 మంది బాలికల ప్రస్తుత ఆరోగ్య పరిస్థితి ఎలా ఉంది? వారికి అందించిన తక్షణ వైద్య చికిత్స వివరాలు. సదరు ఎస్టీ బాలికల వసతి గృహంలో ఆహార నాణ్యత, తాగునీటి సదుపాయం, వంటగది పరిశుభ్రత మరియు పారిశుద్ధ్య నిర్వహణపై చేపట్టిన విచారణ ఫలితాలు.

బాధ్యులపై తీసుకున్న చర్యలు… విద్యార్థినుల ప్రాణాలతో చెలగాటమాడిన వసతి గృహ అధికారులు, సిబ్బంది లేదా కాంట్రాక్టర్లపై ఏ రకమైన క్రమశిక్షణా లేదా చట్టపరమైన చర్యలు తీసుకున్నారు.? ఇలాంటి విషాదకర సంఘటనలు భవిష్యత్తులో జిల్లాలోని ఏ ఇతర ప్రభుత్వ వసతి గృహాల్లోనూ పునరావృతం కాకుండా ఉండటానికి చేపట్టిన ముందస్తు జాగ్రత్తలు మరియు సరిదిద్దే చర్యల వివరాలు.

విద్యార్థినుల ఆరోగ్యంతో ముడిపడి ఉన్న ఈ సున్నితమైన అంశంపై జిల్లా యంత్రాంగం అత్యంత బాధ్యతాయుతంగా వ్యవహరించాలని, బాధ్యులపై కఠిన చర్యలు తీసుకోవడం ద్వారా ఇతరులకు హెచ్చరికగా నిలవాలని భావిస్తోంది. ఈ కేసు తదుపరి విచారణను మరియు నివేదిక సమర్పణను కమిషన్ సెప్టెంబర్ 07, 2026 నాటికి వాయిదా వేసింది.