CM Revanth Reddy | వరి సాగులో పంజాబ్‌నే దాటేసిన తెలంగాణ

Published: 15 Aug 2026 • 04:00 PM

* కృష్ణా, గోదావరి జలాల వాటాలో రాజీపడేదే లేదు
– సీఎం రేవంత్

ఆకేరు న్యూస్, హైదరాబాద్: రాష్ట్రంలో వ్యవసాయ రంగాన్ని పండుగలా మార్చడమే ధ్యేయంగా ప్రజా ప్రభుత్వం పనిచేస్తోందని తెలంగాణ ముఖ్యమంత్రి ఎ. రేవంత్ రెడ్డి స్పష్టం చేశారు. 80వ స్వాతంత్ర్య దినోత్సవాన్ని పురస్కరించుకుని చారిత్రక గోల్కొండ కోటపై జాతీయ జెండాను ఆవిష్కరించిన అనంతరం ఆయన రాష్ట్ర రైతాంగాన్ని, ప్రజలను ఉద్దేశించి మాట్లాడారు.

* వరి సాగు విస్తీర్ణంలో దేశంలోనే నంబర్ 1..

ప్రభుత్వం తీసుకున్న రైతు అనుకూల విధానాలు, సకాలంలో కల్పించిన మౌలిక వసతులు మరియు రైతాంగ కష్టార్జితం ఫలితంగా తెలంగాణ సరికొత్త రికార్డు సృష్టించిందని ముఖ్యమంత్రి వెల్లడించారు. వరి సాగు విస్తీర్ణంతో పాటు దిగుబడిలో కూడా సాంప్రదాయ వ్యవసాయ రాష్ట్రమైన పంజాబ్‌ను అధిగమించి, తెలంగాణ దేశంలోనే మొదటి స్థానంలో నిలిచిందని సంతోషం వ్యక్తం చేశారు. నాణ్యమైన ధాన్యం ఉత్పత్తితో పాటు కొనుగోలు ప్రక్రియలోనూ పారదర్శకత పాటిస్తూ రికార్డు స్థాయిలో ధాన్యం సేకరించామని వివరించారు.

* కృష్ణా, గోదావరి జలాల్లో రాజీపడే ప్రసక్తి లేదు..

రాష్ట్ర హక్కులకు సంబంధించిన అంతర్రాష్ట్ర నదీ జలాల విషయంలో తెలంగాణ ఎప్పటికీ తగ్గదని సీఎం స్పష్టం చేశారు. కృష్ణా మరియు గోదావరి నదులలో తెలంగాణకు చట్టబద్ధంగా దక్కాల్సిన నీటి వాటాను సాధించి తీరుతామని పునరుద్ఘాటించారు. ఎగువ రాష్ట్రాలు లేదా పొరుగు రాష్ట్రాల నుంచి రావాల్సిన నీటి విషయంలో కఠినంగా వ్యవహరిస్తామని, తెలంగాణ హక్కులకు భంగం వాటిల్లకుండా చట్టపరమైన, పరిపాలనాపరమైన చర్యలు వేగవంతం చేశామని వెల్లడించారు.

* పెండింగ్ ప్రాజెక్టులకు ప్రాధాన్య క్రమంలో మోక్షం..

సాగునీటి రంగాన్ని గాడిలో పెట్టేందుకు ప్రత్యేక కార్యాచరణ అమలు చేస్తున్నామని ముఖ్యమంత్రి చెప్పారు.
తుమ్మడిహెట్టి నుంచి పాలమూరు రంగారెడ్డి ఎత్తిపోతల పథకం (PRLIS) వరకు నిలిచిపోయిన లేదా పెండింగ్‌లో ఉన్న సాగునీటి ప్రాజెక్టులను ప్రాధాన్యతా క్రమంలో వేగంగా పూర్తి చేస్తామన్నారు.

నిధుల కొరత లేకుండా చూస్తూ, నిర్మాణ పనుల్లో పారదర్శకత పెంచి ప్రతి ప్రాజెక్టునూ త్వరలోనే అందుబాటులోకి తెస్తామని హామీ ఇచ్చారు.
కాల్వల చివరన ఉన్న ప్రతీ ఎకరం (చివరి ఆయకట్టు) వరకూ సాగునీరు అందేలా ప్రణాళికలు సిద్ధం చేశామని తెలిపారు.

* రైతు సంక్షేమానికి కట్టుబడి ఉన్నాం..

రూ. 2 లక్షల రుణమాఫీ ప్రక్రియను విజయవంతంగా అమలు చేసి కోట్లాది రైతు కుటుంబాల్లో వెలుగులు నింపామని, రైతు భరోసా మరియు ఇతర సంక్షేమ పథకాల ద్వారా రైతాంగానికి కొండంత అండగా నిలుస్తున్నామని సీఎం రేవంత్ రెడ్డి తెలిపారు. వ్యవసాయం లాభసాటిగా మారినప్పుడే రాష్ట్ర ఆర్థిక వ్యవస్థ మరింత బలోపేతం అవుతుందని ఆయన వ్యాఖ్యానించారు.