MAYOR GUNDU SUDHARANI | రూ.76.56 కోట్లతో అభివృద్ధి పనులు

Published: 06 May 2026 • 01:49 PM

ఆకేరు న్యూస్, వరంగల్ :
ఓరుగల్లు నగరాభివృద్ధిలో మరో కీలక ఘట్టం ఆవిష్కృతమైంది. బుధవారం గ్రేటర్ వరంగల్ మున్సిపల్ కార్పొరేషన్ (GWMC) ప్రధాన కార్యాలయంలో మేయర్ గుండు సుధారాణి అధ్యక్షతన జరిగిన కౌన్సిల్ సమావేశం నగర ప్రగతికి బాటలు వేసింది. ఈ భేటీలో మొత్తం 20 అంశాలకు సంబంధించి 76.56 కోట్ల రూపాయల విలువైన అభివృద్ధి పనులకు కౌన్సిల్ పచ్చజెండా ఊపింది.

* ప్రజాప్రతినిధుల సమష్టి భాగస్వామ్యం

నగర అభివృద్ధిపై జరిగిన ఈ చర్చలో వరంగల్ పార్లమెంట్ సభ్యురాలు డాక్టర్ కడియం కావ్య, ఎమ్మెల్సీ బస్వరాజు సారయ్య, పశ్చిమ ఎమ్మెల్యే నాయిని రాజేందర్ రెడ్డి, వర్ధన్నపేట ఎమ్మెల్యే కేఆర్ నాగరాజు హాజరై తమ సూచనలు అందించారు. హన్మకొండ కలెక్టర్ మరియు ఇంచార్జి కమిషనర్ చాహాత్ బాజ్ పాయితో పాటు కార్పొరేటర్లు, వివిధ శాఖల అధికారులు ఈ సమావేశంలో పాల్గొని అభివృద్ధి ప్రణాళికలపై చర్చించారు.

* ఐదేళ్ల ప్రస్థానం – అక్షరాలా అభివృద్ధి

సమావేశంలో మేయర్ మాట్లాడుతూ గత ఐదేళ్ల పాలనలో వరంగల్ సాధించిన మైలురాళ్లను వివరించారు. రాజకీయాలకు తావులేకుండా నగర శ్రేయస్సు కోసమే పాలకవర్గం పని చేసిందని ఆమె స్పష్టం చేశారు. గత ఐదేళ్ల కాలంలో రూ. 3,331 కోట్లతో వేలాది అభివృద్ధి పనులను చేపట్టామని, అందులో అత్యధిక శాతం పనులు ఇప్పటికే ప్రజలకు అందుబాటులోకి వచ్చాయని మేయర్ తెలిపారు.

ముఖ్యమంత్రి రేవంత్ రెడ్డి గారి ప్రత్యేక చొరవతో నగరానికి నిధుల కొరత లేకుండా చూస్తున్నామని, అభివృద్ధి పనులు శరవేగంగా జరుగుతున్నాయని పేర్కొన్నారు.నగర ప్రజల చిరకాల వాంఛ అయిన అండర్‌గ్రౌండ్ డ్రైనేజీ ప్రాజెక్టును పట్టాలెక్కించడం తమ ప్రభుత్వ చిత్తశుద్ధికి నిదర్శనమని కొనియాడారు. స్మార్ట్ సిటీ ప్రాజెక్టుల ద్వారా రోడ్లు, జంక్షన్లు, మరియు చెరువుల సుందరీకరణ పనులు పూర్తి చేసి నగరాన్ని పర్యాటక కేంద్రంగా తీర్చిదిద్దుతున్నామని వివరించారు.

* ముంపు నివారణపై ప్రత్యేక దృష్టి

భవిష్యత్తులో నగరం వరద ముప్పుకు గురికాకుండా ఉండేందుకు శాశ్వత పరిష్కార మార్గాలను అన్వేషిస్తున్నట్లు మేయర్ వెల్లడించారు. రూ. 550 కోట్ల యూఐడీఎఫ్ (UIDF) నిధులు మరియు రూ. 25 కోట్ల ప్రత్యేక నిధులతో నాలాల విస్తరణ, వరద నివారణ చర్యలు చేపట్టామన్నారు. రూ. 100 కోట్ల ఎస్పీవీ నిధులతో వంతెనలు, డ్రెయిన్ల నిర్మాణం వేగవంతం చేశామని తెలిపారు. పారిశుద్ధ్య నిర్వహణతో పాటు నగరవాసులకు నిత్యం తాగునీరు అందించేలా మౌలిక సదుపాయాలను పటిష్టం చేశామని చెప్పారు.

* ఆదర్శ నగరంగా వరంగల్

వరంగల్, హన్మకొండ, కాజీపేట ప్రాంతాలను ఏకీకృతం చేస్తూ సమగ్ర అభివృద్ధికి ప్రణాళికలు రూపొందించామని, వరంగల్‌ను దేశంలోనే ఒక ఆదర్శవంతమైన నగరంగా నిలబెడతామని మేయర్ ధీమా వ్యక్తం చేశారు. ఈ కార్యక్రమంలో సహకరించిన మంత్రులు, ప్రజాప్రతినిధులు మరియు అధికారులకు ఆమె ఈ సందర్భంగా కృతజ్ఞతలు తెలిపారు.