Mahabubabad | మీసేవ కేంద్రాలపై అధికారుల రైడ్స్

Published: 05 Aug 2026 • 06:55 PM

ఆకేరు న్యూస్, మహబూబాబాద్:

మహబూబాబాద్ జిల్లా పరిధిలోని గార్ల, డోర్నకల్ మండలాల్లో శుక్రవారం పలు మీ సేవ (MeeSeva) కేంద్రాలపై సంబంధిత ప్రభుత్వ అధికారులు ఆకస్మికంగా తనిఖీలు నిర్వహించారు. ప్రభుత్వ సేవలు సామాన్య ప్రజలకు పారదర్శకంగా, నాణ్యంగా అందుతున్నాయా లేదా అనే అంశ పరిశీలనలో భాగంగా ఈ రైడ్స్ చేపట్టారు. తనిఖీల్లో భాగంగా ప్రతి కేంద్రాన్ని క్షుణ్ణంగా పరిశీలించిన అధికారులు, నిర్వాహకులు పాటిస్తున్న నిబంధనల వివరాలను ఆరా తీశారు.

* సిటిజన్ చార్టర్ బోర్డులు తప్పనిసరి..

ఈ సందర్భంగా అధికారులు మాట్లాడుతూ, మీ సేవ కేంద్రాల వద్ద ప్రజలకు స్పష్టంగా కనిపించేలా సిటిజన్ చార్టర్, సేవలకు సంబంధించిన వివరాలు, సంబంధిత అధికారుల ఫోన్ నంబర్లు తప్పనిసరిగా ప్రదర్శించాలని ఆదేశించారు. ఏ సేవకు ఎంత గడువు పడుతుంది, దానికి ప్రభుత్వం నిర్ణయించిన అధికారిక రుసుము ఎంత అనే సమాచారాన్ని బోర్డులపై ప్రదర్శించడం నిబంధనలలో భాగమని స్పష్టం చేశారు.

* అదనపు ఛార్జీలు వసూలు చేస్తే కఠిన చర్యలు…

ప్రభుత్వం నిబంధనల ప్రకారం నిర్ణయించిన రుసుములకు మించి ప్రజల వద్ద నుండి అదనపు చార్జీలు వసూలు చేయకూడదని నిర్వాహకులను తీవ్రంగా హెచ్చరించారు. సర్వీస్ పేరుతో సామాన్యులను ఇబ్బందులకు గురిచేసినా, అధిక మొత్తంలో డబ్బులు డిమాండ్ చేసినా ఉపేక్షించేది లేదని స్పష్టం చేశారు. నిబంధనలను ఉల్లంఘించే కేంద్రాల లైసెన్సులను రద్దు చేయడంతో పాటు, వారిపై చట్టరీత్యా కఠిన చర్యలు తీసుకుంటామని హెచ్చరించారు.

* పారదర్శకమైన సేవలే లక్ష్యం…

ప్రజల నుంచి వస్తున్న ఫిర్యాదుల నేపథ్యంలోనే ఈ తనిఖీలు చేపట్టినట్లు అధికారులు వెల్లడించారు. భవిష్యత్తులో కూడా ఇలాంటి ఆకస్మిక తనిఖీలు కొనసాగుతాయని, ప్రతి మీ సేవ కేంద్రం బాధ్యతాయుతంగా వ్యవహరించి ప్రజలకు సరైన సేవలు అందించాలని సూచించారు. మీ సేవ కేంద్రాల్లో ఏదైనా అక్రమాలు జరిగినా లేదా అదనపు రుసుములు డిమాండ్ చేసినా వెంటనే అధికారుల దృష్టికి తీసుకురావాలని ప్రజలకు విజ్ఞప్తి చేశారు.